Vinstri grænir virðast hver af öðrum vera að vakna upp við vondan draum þessa daganna. Ósigur fyrrverandi formanns, Katrínar Jakobsdóttur, í forsetakosningum virðist valda því að skyndilega átta innmúraðir Vg-liðar sig á því að flokkurinn hafi gefið afslátt á öll sín stefnumál í samstarfinu við Sjálfstæðisflokkinn. Margir hafa bent á í nú nokkur ár að varla sé hægt að tala lengur um afslátt á stefnumálum. Nærtækara væri að tala segja að flokkurinn hafi verið algjörlega undirgefinn í ríkisstjórnarsamstarfinu.

Nýjasta dæmið um þessa vakningu er Jódís Skúladóttir, þingkona flokksins, en í viðtali við Vísi í dag segir hún: „VG-liðar hafa gengið of langt í málamiðlunum í ríkisstjórnarsamstarfinu að mati þingmanns flokksins og hreyfingin getur ekki gefið meiri afslátt“

Annar þingmaður, Píratinn Björn Leví Gunnarson, segir þetta í raun vera kaldar kveðjur til Katrínar. Björn segir afar ósanngjarnt að skella allri skuld á brunaútsölu flokksins á stefnumálum sínum á Katrínu eina. „Kaldar kveðjur sem fyrrverandi formaður flokksins fær um hæfileika sína til að gera málamiðlanir. Einnig veltir maður því fyrir sér hvort almennir þingmenn eða grasrót hafi ekkert um þær málamiðlanir að segja og beri því ekki einhverja ábyrgð á þessu,“ spyr Björn Leví á Facebook.

Hann segist þó fagnað þeim áfanga að þessu sé ekki lengur afneitað í rauðan dauðan af Vg-liðum. „Því ber samt að fagna að þetta sé viðurkennt. Hingað til hefur þessum vanda verið þverneitað. Vandinn er kannski að vandinn er enn til staðar. Nú eru þinglok í gangi þar sem alls konar málamiðlanir eru gerðar og gagnrýni td. umboðsmanns barna er víst bara misskilningur,“ skrifar Björn