Lilja Alfreðsdóttir menningarráðherra sem hefur mest um framtíð fjölmiðla að segja hér á landi, segir að netárásin sem leiddi til mikilli vandræða fyrir útgáfu Morgunblaðsins og sló út fréttavefnum mbl.is um margra klukkutíma skeið, sé grafalvarleg.

Þetta kemur fram í færslu á samfélagsmiðlum frá Lilju þar sem ráðherrann skrifar eftirfarandi:

„Þetta er árás á lýðræðið í landinu og frjáls skoðanaskipti. Uppruni árásarinnar er tengdur við rússnesk glæpasamtök. Tilgangur þessarar atlögu er að vekja ótta og þagga niður í fjölmiðlum, því var afar ánægjulegt að fá Morgunblaðið inn um lúguna þennan morgun. Við verðum að vera vakandi gagnvart þessari ógn og ætíð standa með lýðræðinu!“

Á facebook hefur skapast umræða um færslu ráðherrans. Hvort frelsið innan Moggans, óttinn og þöggunin, hafi jafnvel án utanaðkomandi inngripa skerst töluvert og án aðstoðar töluhakkara með Davíð Oddsson ritstjóra í hásæti.

„Stundum koma ógnirnar ekki bara að utan heldur einnig að innan,“ sagði landskunnur fjölmiðlamaður en eyddi svo færslu sinni eftir að hafa verið sakaður um smekkleysu.

Hvað sem því líður hljóta landsmenn að taka undir að verja verður fjölmiðlana í landinu. Ekki bara fyrir netárásum heldur .arf að verja þá fyrir margskonar þrýstingi og jafnvel ofbeldi sem getur bjagað áherslur frétta- og blaðamanna.

Staða fjölmiðla er mjög veik og hefur verið haft á orði að sjálfstæðs blaðamennska sé í frjálsu falli.