„Ef við ætlum að ná fram, þá þarf hér að verða bylting hér. Innflytjendur verða að taka sig saman. Ef stjórnmálaflokkar ætla ekki að hafa innflytjendur á sínum listum til að svara, þá þurfa innflytjendur að svara fyrir sig sjálfir og stofna stjórnmálaflokk.“
Þetta segir Jasmina Vajzovic í viðtali við Björn Þorláks við Rauða borðið á Samstöðinni í kvöld. Hún lýsir höfnun og útilokun sem hún upplifði eftir röðun á lista Viðreisnar. Í viðtalinu sem sýnt verður í kvöld mun Jasmina upplýsa okkur um hugmyndir um stofnun nýs stjórnmálaflokks, sem aðeins yrði skipaður innflytjendum.
„Ég hef átt umræður síðustu þrjá daga um þetta og ég mun klárlega hvetja til þess. Ég mun skoða þetta frá öllum sjónarmiðum og fara á stað með þá vinnu, alveg sama hvort ég verði í þeim flokki. Ég mun allavega hvetja fólk, safna fólki saman, til þess að virkja þau í lýðræði. Þetta er mín ósk. Miðað við þróunina, við erum orðin svo mörg á svo stuttum tíma, við erum svo mörg sem höfum ekki rödd. Eitt af sameiginlegum málum innflytjenda er einfaldlega kosningaréttur, ég myndi vilja lækka þröskuldinn. Stjórnmálamenn munu aldrei taka þátt í því fyrr en þau sjá hag af því,“ segir Jasmina.
Við Rauða borðið í kvöld mun Jasmina greina nánar frá þessu nýja framboði innflytjenda.