Alþjóðagjaldeyrissjóðurinn AGS skorar á ríkisstjórn Liz Truss að draga skattalækkanir sínar til baka, 45 milljarða punda eftirgjöf á sköttum sem fer að mestu til hinna ríkustu og tekjuhæstu. AGS segir þetta vinna bæði gegn tilraunum Englandsbanka til að vinna gegn verðbólgu og veikja möguleika ríkissjóðs til aðstoða þau heimili sem harðast hafa orðið fyrir kaupmáttarrýrnun vegna orkukreppu og verðbólgu.

Viðbót Kwasi Kwarteng við fjárlögin sem fólu í sér skattalækkanir til hinna betur settu fær hvergi góðar viðtökur. Pundið féll og skuldabréfaálag á ríkisskuldabréf Bretlands rauk upp. Ríkisstjórnin jók hallann á ríkissjóði og kostnaðinn við að fjármagna hann. Matsfyrirtækið Moody’s sendi frá sér viðvörun, sagði að skattalækkanir Kwarteng og Truss gætu fellt lánshæfnismat Bretlands.

Jafnvel helstu kirkjur nýfrjálshyggjunnar, Alþjóðagjaldeyrissjóðurinn og matsfyrirtækin, hafna endurfæddum Thatcherisma Liz Truss. Hún sigraði leiðtogakjörið með loforðum um skattalækkanir, en svo virðist sem aðeins þau fáu, gömlu og ríku sem velja leiðtoga Íhaldsflokksins trúi enn á þessa stefnu. Þessi hópur klappaði Truss upp á meðan restin af heiminum sé að púa hana niður.

Í yfirlýsingu Alþjóðabankans segir að ríkisstjórn Truss hafi tækifæri til að kynna skárri aðgerðir í fjárlögum næsta árs, aðgerðir sem eru fókuseraðri á þau sem hafa lent í vanda vegna verðbólgunnar í stað þess að auka ráðstöfunarfé hinna best settu.

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Þú getur skráð þig hér: Skráning félaga