„Við þurfum að horfast í augu við það að undir stjórn Bjarna höfum við misst stóran hluta heillar kynslóðar sjálfstæðiskvenna úr flokknum. Það var einmitt í formannstíð hans, fyrir ekki svo mörgum árum, sem 11 konur af 14 sögðu sig úr stjórn Landssambands sjálfstæðiskvenna vegna óánægju með stöðu jafnréttismála innan flokksins,“ skrifa fimm Sjálfstæðisflokkskonur í grein á Vísi. Þær segja Bjarna Benediktsson formann flokksins alls ekki hafa greitt götu kvenna innan flokksins.

Öfugt við það sem hann heldur fram. „Bjarni nefnir það gjarnan að hafa stutt tvær ungar konur til setu á ráðherrastól, þær Áslaugu Örnu og Þórdísi Kolbrúnu, til að sýna fram á að hann styðji við konur í flokknum. Við tökum undir að við Sjálfstæðisfólk getum verið stolt af því að eiga slíkar frambærilegar ungar konur í okkar röðum. Það var einmitt Guðlaugur Þór sem greiddi götu Áslaugar Örnu með því að stíga til hliðar er hún bauð sig fram til ritara á landsfundi árið 2016. Önnur frambærileg kona á uppleið sem má nefna í þessu samhengi er Diljá Mist Einarsdóttir, þingmaður og fyrrum aðstoðarmaður Guðlaugs Þórs, sem kom með krafti inn á sviðið í síðustu þingkosningum og hefur notið mikils stuðnings, meðal annars frá Guðlaugi,“ skrifa konurnar.

Þessi grein er hluti af kosningabaráttu formannsefnanna, sem meðal annars hefur snúist um hvor hinna miðaldra karla er betri fyrir konur í flokknum.

Lesa má greinina hér: Týnd kyn­slóð Sjálf­stæðis­kvenna undir for­ystu Bjarna Bene­dikts­sonar.

Myndin er af Bjarna í hópi karla í Valhöll.