Alma segist nauðbeygð til að sækja 75 þús. kr. til öryrkja þrátt fyrir 12,4 milljarða hagnað

Leigufélagið Alma hefur sent frá sér tilkynningu þar sem félagið harmar ekki hækkun á leigu né segist ætla að draga hana til baka. Þvert á móti segist félagið, sem skilaði 12,4 milljarða króna hagnaði í fyrra, hafa verið nauðbeygð til að hækka leigu á 62 ára gamalli konu, öryrkja með 300 þús. kr. ráðstöfunartekjur, um 30%. Upp í 325 þús. kr. á mánuði.

Alma er eigu Langasjávar, fjárfestingafélags systkinanna Guðnýjar Eddu, Eggerts Árna, Halldórs Páls og Gunnars Þórs Gíslabarna og fjölskyldna þeirra. Langisjór er móðurfélag fyrirtækja í framleiðslu og dreifingu á matvælum ásamt Ölmu og hlutar í öðrum fasteignafélögum. Meðal fyrirtækja í samstæðu Langasjávar ehf. eru Brimgarðar ehf., Mata hf., Matfugl ehf., Salathúsið ehf., og Síld og fiskur ehf. sem selur vörur undir vörumerkinu Ali.

Systkinin komu fyrir í Paradísarskjölunum, en félög á þeirra vegum eru skráð í skattaskjóli í Möltu. Félag þeirra kom við sögu í Hrunmálum, fékk lán hjá Kaupþing til að kaupa hlutabréf í bankanum, en slíkt er ólöglegt. Þau voru uppvís af brotum á samkeppnislögum snemma á öldinni, eins og frægt varð, þegar samkomulag var gert í Öskjuhliðinni um að halda uppi verði á grænmeti og ávöxtum. Þau hafa líka verið sektuð fyrir brot á samkeppnislögum vegna viðskipta sinna við Bónus, sem snerust um að halda öðrum frá viðskiptunum. Þau þáðu ríkisstyrk í cóvid, fengu hlutabætur þótt ekki væri að sjá að nokkurt högg hefði orðið á rekstur fyrirtækja þeirra.

Systkinin eru meðal auðugasta fólks á Íslandi. Börnin þeirra eru þriðja kynslóð auðugs fólks. Faðir þeirra, Gísli V. Einarsson, byggði upp Mata á sínum tíma.

Í samtali við Rauða borðið benti Brynja Hrönn Bjarnadóttir, leigjandinn sem fékk tilkynninguna um hækkun á leigunni í jólagjöf að hún væri þriðja kynslóð af fátæku fólki. Fjölskyldur sem lenda í fátækt og eiga allt sitt undir hinum auðugu og þjónum þeirra meðal stjórnvalda ná sjaldnast að vinna sig upp úr fátæktinni. Eru föst þar og ekki varin af stjórnvöldum fyrir græðgi þeirra sem eiga mikið en sífellt vilja eignast meira. Láta ekkert stoppa sig, hvorki siðferði né lög.

Viðtalið við Brynju má sjá og heyra hér:

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Skrá mig arrow_forward

Rauða borðið
í beinni
Rauða borðið, 24. maí