Meðlimir verkalýðsfélaga í Frakklandi rjúfa orku til auðmanna og þingmanna í aðgerðum sínum. Á sama tíma lækka þeir reikninga til einyrkja og smá fyrirtækja svo sem bakara í aðgerð sem þeir kenna við Hróa Hött.  Við verðum að grípa til aðgerða sem bítur á stuðningsmenn ríkisstjórnarinnar auðmenn og þingmenn, segir talsmaður verkalýðsfélagsins. 

Varnarbaráttan fyrir eftirlaunakerfinu heldur áfram í þessari viku. Meðal aðgerða í síðustu viku var þriggja klukkustunda rof á orku til skrifstofu þingmanns í flokki Macrons. Alls var dregið úr framleiðslu orku um sjö þúsund megavött í mótmælum í þar síðustu viku.

Boðað er framhald á þess háttar aðgerðum. Fram undan eru aðgerðir gegn auðfólki, sérstaklega Yannick Bolloré, auðmanni sem er aðaleigandi Vivendi, sem á og rekur Channel+ og þar með hægri sinnuðu fréttaveituna CNews.

Meðlimir CGT verkalýðssambandsins vinna í orkuverum, olíuhreinsistöðvum og orkudreifingu. Þau eru því í aðstöðu til að breyta rafmagnsmælum, gasmælum og samtímis skerða orkuafhendingu til valdafólks. Talsmaður verkalýðsfélagsins segir að milljónir búi við skort því sé mikilvægt að hinir valdamiklu geti sett sig í spor þeirra sem búa við orkufátækt.

Stjórnvöld hafa brugðist harkalega við þessum aðgerðum og kært þær til lögreglu. Í lýðræðisríki eiga lýðræðislega kjörin stjórnvöld að stjórna landinu, ekki verkalýðsfélögin, segja talsmenn þeirra. Og segja aðgerðir sem skerða orkuafhendingu ólíðandi.

Á morgun þriðjudag eru boðaðir fjölmargir mótmælafundir og göngur. Búist er við að jafnvel milljónir munu mæta til mótmæla.

Myndin: CGT liðar búa sig undir aðra lotu mótmæla.