Aðeins voru veitt 67 hlutdeildarlán í fyrra, en þeim er ætlað að auðvelda ungu fólki og fyrstu kaupendum að eignast íbúð. Árið 2021 voru 371 hlutdeildarlán veitt. Í fyrra varð því algjört hrun í þessum stuðningi, lánin voru aðeins 18% í fyrra af því sem var í hittifyrra.
Árið 2021 sóttu 627 um hlutdeildarlán. Sumir hættu við en öðrum var hafnað. 371 fengu lán eða 59% þeirra sem sóttu um.
2022 sóttu 146 um og 67 fengu lán. Sem gera 46%. Það sóttu því bæði færri um og færri af þeim sem sóttu um stóðust kröfur lánanna.
Það sem grefur undan þessu kerfi er hækkun söluverðs íbúða. Sú hækkun hefur sprengt öll viðmiðunarmörk svo það er erfitt að finna íbúð sem er nógu ódýr til að falla undir viðmið kerfisins.
Viðbrögð stjórnvalda hafa verið engin. Kerfið hefur einfaldlega verið láta fjara út.
Húsnæðis- og mannvirkjastofnun sendi frá sér fréttatilkynningu í morgun um þessi lán. Þar er hins vegar ekki fjallað um hrun kerfisins og hversu fáir fengu lán í fyrra en öll áhersla lögð á þau sem sluppu í gegn í fyrra en einkum í hittifyrra og árið það áður. Þetta er sammerkt öllu sem stofnunin sendir frá sér. Því er ætlað að mæra húsnæðisstefnu stjórnvalda en alls ekki benda á vankanta hennar.
Samkvæmt tilkynningunni var kaupverð eignanna sem lánin voru notuð til að kaupa um 40 m.kr. Það er erfitt að finna íbúðir á höfuðborgarsvæðinu á því verði í dag.
Myndin er af upphafi atriðis um húsnæðismarkaðinn í Áramótaskaupinu, sem fjallaði um ungt fólk sem býr heima hjá foreldrum sínum ásamt barni, fyrrverandi maka, erlendu verkafólki og fleirum.
