Leigan sem útigangsfólk er rukkað um er 87 þús. kr. í húsaleigu og 10 þús. kr. í svokallað húsgjald fyrir tæplega 25 fermetra íbúðagáma úti á Granda. Fermetraverðið er um 3.900 kr. sem er nokkuð yfir meðalverði á litlum íbúðum. Gámarnir voru án hita í vetur og eru langt frá því að geta talist góðir íverustaðir.

Heimsókn fréttastofu Stöðvar 2 til Péturs Geirs Óskarssonar, sem býr í einum af gámunum, vakti athygli. Pétur Geir lýsti hversu hrörlegar vistaverur þetta eru, kaldar og illa varðar fyrir ágengni veðurs og fólks.

Í fréttinni kom fram að útigangsfólkið er rukkað um tæplega 97 þús. kr. fyrir þessi hús, sem í reynd eru innréttaðir stálgámar. Það eru tæpar 3.900 kr. á fermetra, sem er um 7% umfram markaðsverð á litlum íbúðum á höfuðborgarsvæðinu í dag. Gámarnir eru þó ekki samanburðarhæfir við venjulegar íbúðir, eru illa farnir, kaldir og óvistlegir.

Myndin er úr frétt Stöðvar 2. Pétur Geir sýnir Vésteini Erni Péturssyni fréttamanni hvernig hann býr.