Jóhann Páll Jóhannsson, þingmaður Samfylkingarinar, segir á Facebook að allt tal um nýja þjóðarsátt sé þvæla. Ástæðan sé einföld: aðstæður nú séu gjörólíkar aðstæðum árið 1990. Nú sé blússandi hagvöxtur og algjör gósentíð hjá hinum ríku. Á sama tíma er meirihluti þjóðarinnar að berjast í bökkum.
Hér fyrir neðan má lesa pistil Jóhanns Páls í heild sinni.
Þjóðarsáttin 1990 var gerð í skugga efnahagssamdráttar, eftir viðvarandi taprekstur og gjaldþrotahrinu í stærstu atvinnugreinum. Þá var ekki mikið til skiptanna.
Nú eru aðstæður allt aðrar í þjóðfélaginu.
Það er blússandi hagvöxtur. Hagnaðartölurnar árin 2021 og 2022 eru þær hæstu á öldinni. Gósentíð hjá stórútgerð þar sem arðgreiðslur eru margfaldar á við veiðigjöld, fjármagnstekjur í hæstu hæðum, meðallaun forstjóra í Kauphöllinni 7 milljónir á mánuði og tekjuhæsta eina prósentið tekur til sín æ stærri skerf af þjóðarkökunni.
Á sama tíma er fjöldi heimila í vanda. Hlutfall þeirra sem segjast eiga erfitt með að ná endum saman hefur þrefaldast á tveimur árum samkvæmt kjarakönnun Gallup. Kaupmáttur fer rýrnandi, leigukostnaður og greiðslubyrði lána rýkur upp og æ fleiri heimili eru rekin á yfirdrætti.
Ráðamenn geta ekki krafið verkalýðshreyfinguna um hófsemi en haldið áfram að reka stefnu sem gerir ríka ríkari á kostnað almennings.
Ef hér á að nást einhver þjóðarsátt verður það að vera þjóðarsátt um réttlátari skiptingu gæðanna og réttlátari skiptingu byrðanna.
Hér fyrir neðan má sjá Jóhann Páll ræða ríkisfjármál í Rauða borðinu fyrir tveimur vikum.