Peningastefnunefnd hækkaði stýrivexti um 1% í morgun, upp í 7,5%. Þeir hafa ekki verið svona háir síðan um vorið 2010. Miðað við viðbrögð bankanna hingað til mun þessi hækkun velta fljótt yfir á heimili og fyrirtæki og magna upp fjármagnskostnaðinn.
„Verðbólguþrýstingur heldur áfram að aukast og verðhækkanir ná til æ fleiri þátta,“ segir í yfirlýsingu nefndarinnar. „Verðbólga mælist nú 10,2% og undirliggjandi verðbólga er 7,2%. Verðbólguvæntingar til lengri tíma eru enn vel yfir markmiði og raunvextir bankans hafa lækkað frá síðasta fundi nefndarinnar. Útlit er fyrir að verðbólga verði meiri á næstunni en spáð var í febrúar þótt hægt hafi á húsnæðismarkaði.“
Nefndin bendir á að hagvöxtur hafi verið mikill í fyrra og vel umfram það sem þjóðarbúskapurinn getur staðið undir til lengdar. Innlend eftirspurn hafi aukist meira en gert var ráð fyrir í febrúar og vísbendingar séu um að hún hafi verið kröftugri í ársbyrjun en talið var. Spenna á vinnumarkaði sé líka jafnframt töluverð.
„Við þessar aðstæður er mikilvægt að koma í veg fyrir víxlverkun hækkandi launa og verðlags, sérstaklega þegar litið er til mikillar spennu í þjóðarbúinu og komandi kjarasamninga. Peningastefnunefnd mun beita tækjum sínum til að tryggja betra jafnvægi í þjóðarbúskapnum og koma verðbólgu í markmið, segir í yfirlýsingu peningastefnunefndar.
Bandaríski Seðlabankinn mun kynna seinna í dag sýna ákvörðun. Talið var að vextir yrðu hækkaðir þar um 0,25%, upp í 5,0%, en órói á fjármálamörkuðum hefur valdið því að það er ekki eins víst og áður. Vaxtahækkun mun ýta undir óróa og koma skuldugum bönkum, fyrirtækjum og heimilum í vanda.
Á móti kemur að verðbólgan virðust víða ekkert vera að gefa eftir. Verðbólga mældist t.d. 10,4% í Bretlandi í febrúar, sem er mun meira en spár gerðu ráð fyrir.
