Barnaheill biðja almenning um aðstoð að skora á stjórnvöld að bregðast við vaxandi ójöfnuði á meðal barna hér á landi. Tryggja þurfi að öll börn njóti sömu tækifæranna; til heilsu, menntunar, verndar og þátttöku.
Barnaheill – Save the Children á Íslandi skora á íslensk stjórnvöld að gera stefnu og aðgerðaáætlun til að uppræta fátækt meðal barna á Íslandi. Hér hafi ekki verið mörkuð stefna í málaflokkinum, líkt og þekkist annarsstaðar í Evrópu.
“Sú stefna og áætlun þarf m.a að tryggja öllum börnum á Íslandi jöfn tækifæri til heilsu, menntunar, verndar og þátttöku,“
Um 10.000 börn eða 13,1% barna búa við fátækt á Íslandi samanborið við 12,7% árið á undan. Þetta kemur fram í nýrri skýrslu Evrópuhóps Barnaheilla – Save the Children sem kom út í byrjun þessa mánaðar.
Í skýrslunni kemur jafnframt fram að árið 2021 áttu 24,1 prósent íslenskra heimila í erfiðleikum vegna útgjalda og nái ekki endum saman. Verðbólga og hækkun vaxta hafi aukið greiðslubyrði fjölskyldna af húsnæðislánum, leiguverð hefur hækkað og allur framfærslukostnaður. Þá búi eitt af hverjum fimm börnum í leiguhúsnæði við fátækt og 8,2 prósent þeirra búa við skort.
