Allir leigjendur Heimstaden á Kjalarnesi hafa fengið uppsagnarbréf. Þetta fullyrðir einn íbúi þar innan Facebook-hópsins Umræðuhópur leigjenda. Sænska leigufélagið, sem á um 1700 íbúðir á Íslandi, tilkynnti nýlega að það ætlaði að hætta starfsemi á Íslandi.

„Jæja, þar kom að því Heimstaden að afhenda öllum leigjendum hér á Kjalarnesi uppsagnarbréfin. Hér eru 24 íbúðir í þeirra eigu og búið í öllum,“ segir kona nokkur sem leigði hjá félaginu.

Fyrir um mánuði greindi Samstöðin frá því að sumir leigjendur hjá Heimstaden hefðu fengið uppsagnarbréf. Þeir sem fengu uppsagnarbréf bjuggu flestir ýmist á Selfossi eða Ásbrú. Þegar Heimstaden tilkynnti að það myndi hætta starfsemi á Íslandi var talað um að félagið myndi selja allar eignir. Málið virðist þó eitthvað flóknara, í það minnsta hyggst félagið ekki ætla að selja þær allar samstundis.

Í uppsagnarbréfi, sem kona nokkur frá Selfossi fékk á dögunum, var þetta orðað svo: „Líkt og fram kom í tilkynningu frá Heimstaden þann 10. maí sl. hefur félagið ákveðið að minna eignasafnið sitt á Íslandi. Íbúðin sem þú ert með á leigu er hluti þeirra eigna sem Heimstaden hyggst selja úr safni sínu.“