Meirihluti Samfylkingarinnar, Framsóknarflokksins og Pírata í skóla- og frístundaráði felldi tillögu Sósíalistaflokks Íslands um að skólamatur skuli ávallt eldaður á staðnum. Í síðustu fjárhagsáætlun samþykkti meirihlutinn að skera niður um 100 milljónir króna til matarinnkaupa á leikskólum.
Í matarstefnu Reykjavíkurborgar sem samþykkt var árið 2018, kemur fram að í skólum og félagsstarfi skuli matur vera nýttur til menntunar og börn taki þátt í henni. Fjárhagsáætlun sem samþykkt var í lok síðasta árs er hins vegar í ósamræmi við þær áætlanir. Meirihlutinn samþykkti í henni að skera niður fjárheimildir til matarinnkaupa um 100 milljónir króna. Þeirri hagræðingu skyldi ná fram með útboðum til lægstbjóðanda. Markmiðið með því er allir leikskólar hætti að elda mat á staðnum.
Fulltrúi Sósíalistaflokks Íslands í skóla- og frístundaráði, Trausti Breiðfjörð Magnússon, lagði fram tillögu í vor um að Reykjavíkurborg framfylgi eigin matarstefnu og tryggi að allur matur sé eldaður á leikskólunum sjálfum. Í tillögunni er einnig tekið fram að börnum skuli boðið að taka þátt í undirbúningi, ræktun og matargerð þegar því verði við komið og eigi þannig hlut í matarmenningu skólans. Þetta væri í samræmi við matarstefnu borgarinnar, en fyrirhuguð útboð á mat til einkafyrirtækja vinna þvert gegn henni.
Tillagan var tekin fyrir 26. júní sl. í skóla- og frístundaráði. Meirihlutinn felldi tillöguna en fulltrúi Sósíalista var sá eini sem kaus með henni. Sjálfstæðisflokkurinn sat hjá. Fulltrúar meirihlutans samþykktu þannig að vinna gegn eigin matarstefnu sem sett var á laggirnar fyrir fimm árum. Allir flokkar í núverandi meirihluta samþykktu hana, að Framsóknarflokknum undanskyldum. Hann gekk til meirihlutasamstarfs með þeim á síðasta ári.