Svo virðist sem það séu ekki allir innan Samfylkingarinnar sammála stefnu Reykjavíkurborgar að útvista hinum ýmsu verkefnum, líkt og sorphirðu og snjómokstri. Afleiðingarnar hafa þeirra stefnu hefur verið að slíkri grunnþjónustu hefur verið sinnt illa. Samstöðin hefur í vikunni fjallað um hvernig einkafyrirtækinu Terra virðist vera um megn að sinna sorphirðu. Flestir muna svo eftir því hve illa gekk að sinna snjómokstri í Reykavík síðastliðinn vetur.

Viðar Eggertsson, varaþingmaður Samfylkingarinnar, skrifar athugasemd við færslu Reykjavíkurborgar á Facebook og gagnrýnir þetta fyrirkomulag. Viðar skrifar: „Einkaframtakinu (Terra) treyst fyrir sorphirðu hjá Sorpu. Falleinkun hjá Terra! Síðan er Sorpa byggðasamlag allra sveitarfélaganna á höfuðborgarsvæðinu þar sem meirihlutinn í stjórn eru sveitarfélög sem stjórnað er af Sjálfstæðisflokknum, svo þetta er allt í höndum XD.“

Teitur Atlason, varaborgarfulltrúi Samfylkingarinnar, tekur undir með honum í athugasemd og skrifar: „Við eigum bara að gera þetta sjálf. Það gekk vel áður en þetta útvistunar-rugl fór í gang.“ Viðar svarar honum og virðist sammála: „Sama með snjómokstur og götuhreinsanir.“