Glúmur Baldvinsson, fyrrverandi oddviti Frjálslynda lýðræðisflokksins, segist ekki missa svefn þó Sjálfstæðisflokkurinn hafi aldrei mælst verr í skoðanakönnunum en nú. Hann segist vona að nú sé þjóðin loksins búin að átta sig á því að Sjálfstæðisflokkurinn er ekki vinur hennar. Sjálfstæðisflokkurinn mælist með rétt rúmlega 16 prósent fylgi í nýrri könnun.
„Ég græt ekki hrun Sjálfstæðisflokksins. Sá flokkur grefur sér gröf og þjóðin virðist loks vera að fatta þessa hundrað ára staðreynd með hjálp Bjarna Ben,“ skrifar Glúmur á Facebook og heldur áfram:
„Sjálfstæðisflokkurinn var aldrei vinur ykkar fyrrum kæru kjósendur hans. Sjálfstæðisflokkurinn er vinur örfárra ríkra manna sem hagnast í skjóli hans. Sjálfstæðisflokkurinn er flokkur fámennrar klíku sérhagsmuna sömu klíku. Bófaflokkur. En ekki flokkur hagsmuna almennings. Hann gengur og gekk aldrei stétt með stètt. Sérhagsmunir ofar almannahagsmunum. Klíkan ofar þjóðarhagsmunum.“
Hann segir að helstu leiðtogar flokksins síðustu hundrað ár hafi verið sendir í pólitíkt til að gæta hagsmuna fjölskyldu sinnar. „Ólafur Thors var sendur í pólitík til að passa uppá fyrirtæki pabba síns Kveldúlf. Bjarni Ben eldri var settur á þing til að passa uppá Engey. Geir Hallgrímsson var svo sendur til að passa uppá H.Ben, Skeljung og Ræsi og nú er Bjarni Ben yngri erindreki pabba síns og Engeyjar – og bankanna. Nú er komið að skuldadögum. Think about it.“
