Aukið innstreymi gjaldmiðla inn í hagkerfið vegna fjölgunar ferðamanna hefur styrkt gengi krónunnar í sumar. Í júní og júlí hækkaði krónan um 2,4% gagnvart svissneskum franka, 3,6% gagnvart evru, 3,7% gagnvart breska pundinu, 6,0% gagnvart Bandaríkjadollar og 8,3% gagnvart japönsku jeni. Íslenska krónan hefur hins vegar lækkað gegn þeirri norsku, um 2,9%

Þessi styrking krónunnar ofan á minnkandi verðbólgu erlendis ætti að draga úr verðbólgu hér innanlands. Það er ef verðlækkun á innflutningi ratar til neytenda. Það er ekki víst að það gerist í landi fákeppni. Mögulega munu fyrirtækin halda lækkuninni hjá sér til að auka við hagnað sinn.

Þumalputtareglan er að ef að krónan fellur um 10% þá leiði það til 4% verðbólgu vegna hækkunar á innflutningi. Að sama skapi ætti 3,6% styrking krónunnar miðað við gengisvísitölu að leiða til þess að verðbólgumæling lækki um 1,4 prósentur.

Við síðustu mælingu Hagstofunnar fyrir júlí mátti illa merkja þessi áhrif. Ástæða þess að verðbólgan dróst þá saman var fyrst og fremst lækkun fasteignaverðs og útsölur. Það mátti ekki greina áhrif af lækkandi verðbólgu erlendis eða hækkun gengis krónunnar.

Hér má sjá breytingar á gengi krónunnar gagnvart þeim gjaldmiðlum sem Seðlabankinn skráir. Eins og sést á töflunni eru miklar sveiflur á gjaldmiðlum á tímum verðbólgu, hárra vaxta og mikilla skulda margra ríkja.