„Flokksráð leggur áherslu á að lokið verði við sölu á öllum hlutum ríkisins í Íslandsbanka í almennu opnu útboði fyrir lok árs 2024. Þá er nauðsynlegt að ríkið losi um eignarhald á Landsbankanum á næstu árum. Ríkið á ekki að standa í verslunarrekstri og því á að bjóða út rekstur Fríhafnarinnar í Flugstöð Leifs Eiríkssonar. Kanna á hagkvæmni þess að fá fjárfesta með sérþekkingu að eignarhaldi flugstöðvarinnar. Leggja á niður ÁTVR og leyfa einkaaðilum smásölu áfengis í sérverslunum,“ segir í samþykkt flokksráðs Sjálfstæðisflokksins.
„Sala ríkisfyrirtækja skal fara fram í gagnsæju ferli,“ er svo bætt við, sem líklega merkir að ekki eigi að selja eftir forskrift Bjarna Benediktssonar formanns flokksins, sem selt hefur ríkiseignir með duldum hætti, bæði í gegnum Lindarhvol og Bankasýsluna.
Á landsfundinum fyrir tæpu ári var líka samþykkt að kanna sölu á Ríkisútvarpinu: „Tilgangur og hlutverk Ríkisútvarpsins hefur breyst. Mikilvægt er að endurskoða forsendur og umfang núverandi rekstrarfyrirkomulags með það að markmiði að kanna hvort rekstrinum sé að öllu leyti eða hluta til betur komið í höndum einkaaðila,“ sagði í ályktun þess fundar.
Í ályktun flokksráðs segir um Ríkisútvarpið: „ Endurskilgreina á hlutverk, skyldur og fjármögnun Ríkisútvarpsins og draga það út af auglýsinga- og samkeppnismarkaði svo og tryggja stöðu sjálfstæðra fjölmiðla, án beinna ríkisstyrkja. Afnema skal útvarpsgjaldið.“
