Háskólinn í Reykjavík hefur flautað af fund um hvalveiðar eftir að Morgunblaðið gerði athugasemdir við hverjum var boðið að tala á fundinum. Eftir athugasemdir Moggans var fundurinn felldur niður og hefur e ekki verið settur á dagskrá.
Morgunblaðið er sem kunnugt er gefið út af stórútgerðinni á Íslandi, sem hefur nú hert árásir sínar á Samkeppnisyfirlit og allt það sem hún skilgreinir sem ógn við völd sín og auð. Og þótt hvalveiðar skipti sáralitlu ef nokkru máli efnahagslega vill stórútgerðin verja þær með rökum kalda stríðsins, um að ef hvalveiðar séu ekki varðar gætu þorskveiðar fallið næst. Þetta sést vel í málgagni stórútgerðarinnar sem hefur meðal annars haldið því fram að hvalveiðar séu stórkostlegt framlag gegn loftlagsvá.
Svo til allir líffræðingar landsins andmæltu þessu í grein, sem lesa má hér: Afskræmd umfjöllun um áhrif hvala í tengslum við loftslagsmálin. Í greininni var sýnt fram á mikilvægi hvala í lífríki sjávar og að þeir væri vörn gegn loftlagsvá, þvert á það sem málgagn stórútgerðarinnar hélt fram. Meðal þeirra sem skrifuðu undir þessa grein var Edda Elísabet Magnúsdóttir, doktor í líffræði. Og Edda Elísabet var ein þeirra sem Sjálfbærni- og loftslagsréttarstofnun Háskólans í Reykjavík fékk til að ræða á fundinum Vísindi og lagaleg álitamál um hvalveiðar.
Þetta sætti Mogginn, málgagn stórútgerðarinnar, sig ekki við. Ekki heldur við að Jóna Þórey Pétursdóttir, lögmaður á lögmannsstofunni Rétti, fengi að tala á þessum fundi. Í frétt Moggans í dag stærir blaðið sig af að hafa komið í veg fyrir að þessar konur fengju að tala opinberlega um fræði sín og þekkingu.
Þar stendur: „Áður en tekin var ákvörðun um frestun fundarins hafði Morgunblaðið samband við Snjólaugu og spurðist fyrir um val á frummælendum, en skv. dagskránni áttu þeir að vera þrír; dr. Edda Elísabet Magnúsdóttir, lektor í líffræði, sem fjalla átti um hvali í vistkerfi sjávar, Jóna Þórey Pétursdóttir, lögmaður á lögmannsstofunni Rétti, sem ræða átti um stöðu hvalveiða í íslenskum rétti, og Ingi B. Poulsen, doktorsnemi við lagadeild HR, sem fjalla átti um hvalveiðar og skuldbindingar ríkisins að loftslagsrétti.
Athygli vakti að dr. Edda Elísabet skyldi hafa verið fengin til að vera einn frummælenda, en hún er yfirlýstur andstæðingur hvalveiða og hefur tekið þátt í mótmælum gegn hvalveiðum, síðast á Austurvelli um miðjan júlí sl. Þá er Jóna Þórey Pétursdóttir starfandi á lögmannsstofunni Rétti sem hefur gætt hagsmuna ýmissa aðila gegn Hval hf. og hafa löglærðir starfsmenn stofunnar verið áberandi á þeim vettvangi undanfarin misseri. Spurð um hvort skoðað yrði út frá faglegum sjónarmiðum lagadeildarinnar að hafa ekki einungis andstæðinga hvalveiða í hópi frummælenda sagði Snjólaug að málið yrði skoðað betur í ljósi framkominna upplýsinga.
Við vinnslu fréttarinnar hafði Snjólaug samband við Morgunblaðið og kunngjörði að fundinum hefði verið frestað. Um ástæður frestunarinnar sagði Snjólaug að í ljósi þess að fréttir væru farnar að kvisast út um fyrirhugaðan fund væri fyrirséð að fundarsalurinn þar sem halda átti fundinn myndi ekki duga fyrir þann fjölda áheyrenda sem vísast myndu mæta til fundarins. Einnig sagði hún að uppi væru áform um að endurskoða hverjir myndu vera frummælendur á fundinum, með það í huga að koma að fleiri sjónarmiðum varðandi hvalveiðarnar en þeirra einna sem væru yfirlýstir andstæðingar veiðanna.“
Háskólinn í Reykjavík er í eigu hagsmunasamtaka fjármagns og fyrirtækjaeigenda. Viðskiptaráð á 64% í skólanum, Samtök iðnaðarins 24% og Samtök atvinnulífsins 12%. Í háskólaráði situr ekki vísindafólk heldur formenn þessara samtaka og aðrir hagsmunaverðir. Það er af þeim ástæðum sem Morgunblaðið getur sagt háskólanum til um hverjir tala á fundum þar og hverjir ekki.
Myndin er af vef Háskólans í Reykjavík, síða sem áður sýndi dagskrá fundar um hvalveiðar.
