Indónesía hefur kynnt til sögunnar nýtt ferli vegabréfsáritana fyrir erlenda fjárfesta, sem landið nefnir „golden visa“ – gyllta vegabréfsáritun. Þetta kom fram í tilkynningu dómsmála- og mannréttindaráðuneytis landsins á sunnudag. Á þriðjudag kom fram að fyrsti erlendi fjárfestirinn til að fá þetta gullna hlið að Indónesíu er Sam Altman, stofnandi og forstjóri gervigreindarfyrirtækisins OpenAI.

Vegabréfsáritun í þessum flokki veitir dvalarleyfi til allt að tíu ára, sagði Silmy Karim, yfirmaður innflytjendamála. Fjárfestar sem hyggjast setja á laggirnar fyrirtæki að verðmæti að minnsta kosti 2,5 milljóna dala, eða yfir 300 milljóna króna, geta fengið dvalarleyfi til fimm ára. Tíu ára dvalarleyfi er aðeins veitt þeim sem leggja til tvöfalda þá fjárhæð, eða sem nemur tæpum 700 milljónum króna, í fjárfestingu.

Í frétt Reuters um málið kemur fram að fleiri lönd hafi kynnt til sögunnar hliðstæðan aðgang fyrir fjárfesta á undanliðnum árum, til að laða fjármagn og frumkvöla til landanna.

Aðskilnaðarstefna Íslands er mildari

Íslensk stjórnvöld hafa ekki gengið svo langt í aðskilnaðarstefnu við landamærin eftir efnahag. Þó kynntu stjórnvöld hér til sögunnar sérstaka langtímavegabréfsáritun, við upphaf ársins 2021, fyrir útlendinga með að minnsta kosti milljón króna tekjur á mánuði: ríkisborgarar landa utan EES-svæðisins geta samkvæmt reglugerð sem þá tók gildi dvalist á Íslandi í allt að 180 daga, séu þeir með að minnsta kosti milljón króna tekjur á mánuði. Í umfjöllun Kjarnans um mitt það ár kom fram að 59 manns hefðu þegar komið til landsins á grundvelli þessa nýja leyfis. Langflestir þeirra voru bandarískir ríkisborgarar.