Skemmdir urðu á kjarnorkuverinu í Zaporizhzia í Úkraínu í gær, þegar gerð var drónaárás á verið. Alþjóðakjarnorkumálastofnunin segir árásina alvarlega og hún geti valdið hættulegum bilunum á kerfi kjarnakljúfs versins. Engu að síður hafi árásin að svo komnu máli ekki valdið kjarnorkuvá, og ekkert bendi til þess að geislavirk efni hafi losnað út í andrúmsloftið.
Rússar hafa kjarnorkuverið í Zaporizhzia á sínu valdi og lýstu því í gær að engin hætta væri á ferðum. Þrír starfsmenn í verinu hefðu slasast en enginn alvarlega. Hins vegar segir Alþjóðakjarnorkumálastofnunin það ekki rétt, einn starfsmaður hafi látið lífið í árásinni.
Í yfirlýsingu stofnunarinnar segir að árásin sé augljóst brot gegn þeirri meginreglu að verja þurfi stærsta kjarnorkuver Evrópu. „Svona kærulausar árásir stórauka hættuna á gríðarlegu kjarnorkuslysi. Þær verður tafarlaust að stöðva,“ sagði Rafael Grossi, framkvæmdastjóri stofnunarinnar í yfirlýsingu á X, áður Twitter.
Drónarnir sem um ræðir eru sagðir hafa verið úkraínskir, og munu meðal annars í þrígang hafa sprungið við megin kjarnakljúf versins að því er Alþjóðakjarnorkumálastofnunin segir. Rússar saka úkraínumenn um að hafa gert ítrekaðar árásir með drónum sem springa við snertingu á verið. Það sé óásættanlegt að beina sprengingum að verinu og innviðum þess, enda sé ekkert kjarnorkuver í heiminum öllum hannað til að standast sprengjuárásir.
Stjórnvöld í Úkraínu hafa hins vegar neitað því að þau hafi nokkuð haft með árásina að gera, heldur kenna Rússum um. Það væri ekki í fyrsta skipti, segja úkraínsk yfirvöld, sem Rússar hefðu stofnað kjarnorkuverum, borgurum og Evrópu allri í slíka hættu.
Að svo komnu máli hefur ekki tekist að sannreyna hver það er sem ber ábyrgð á árásinni.
