Þrettán manns hið minnsta eru látin eftir flugskeytaárás Rússa á borgina Chernihiv í norðanverðri Úkraínu. Stjórnvöld í Úkraínu kalla enn á ný eftir hjálp við loftvarnir sínar frá bandalagsþjóðum.
Ihor Klymenko innanríkisráðherra Úkraínu sagði í dag að byggingar, bílar og innviðir hefðu orðið fyrir skemmdum í árásinni og þá væru að minnsta kosti á sjöunda tug manns særðir eftir árásina. Starfandi borgarstjóri í Chernihiv, Oleksandr Lomako, lýsti því að þrjár öflugar sprengingar hefðu orðið á fjölförnum stað í borginni skömmu eftir 9:00 í morgun að staðartíma.
Rússar hafa ekki gefið út yfirlýsingu vegna árásarinnar en stjórnvöld í Kreml hafa þráfaldlega neitað því að þau beini árásum sínum að almennum borgurum.
Chernihiv er í um 150 kílómetra fjarlægð í norður frá höfuðborginni Kænugarði, nálægt landamærunum að Rússlandi og Belarús. Þar búa um 250 þúsund manns.
„Þetta hefði ekki átt sér stað hefði Úkraína verið búin að fá fullnægjandi loftvarnarkerfi, og ef vilji þjóða heims til að standa gegn rússnesku ógninni hefði verið nægjanlegur,“ sagði Volodomyr Zelensky Úkraínuforseti á samfélagsmiðlum og endurtók beiðnir sínar um slíkan stuðning enn á ný.
