Vera kann að einkarekstur grunnskólanna á Íslandi sé nær veruleikanum en margur hyggur.
Um þetta vitna raddir inni í stjórnkerfinu. Þá flutti framkvæmdastjóri Viðskiptaráðs tölu við útskrift frá Háskólanum í Reykjavík um helgina. Hann vék orðum sínum að einkavæðingu grunnskólans á Íslandi.
Viðskiptaráð er oft notað í pólitískum tilgangi til að ryðja brautina fyrir stefnumál Sjálfstæðisflokksins hér á landi. Gestir sem heyrðu orð formannsins, Björns Brynjúlfs Björnssonar, segja að farið hafi um suma í salnum þegar talið barst að einkarekstrinum. Aðrir hafi verið ánægðir með ræðuna. Árangursmælingar svo sem Pisa sýni að í öllu falli þurfi uppskurð á skólakerfinu sem lengi var full sátt um að yrði á könnu hins opinbera.
Þeir sem telja að einkareknu grunnskólakerfi fylgir stóraukinn ójöfnuður segja oft grafið undir kerfum sem eru undir stjórn hins opinbera áður en einkavæðing er sett á dagskrá. Stundum sé fjársvelti eða staðið fyrir breytingum sem auki óánægju almennings með núverandi kerfi sem opni pólitíska leið til örlagaríkra breytinga.
Miklar og hraðar vendingar hafa orðið undir stjórn ráðherra eins og Illuga Gunnarssonar og Áslaugar Önnu Sigurbjörnsdóttur. Skiptar skoðnir eru um einkavæðingu grunnskólanna innan jafnt Framsóknarflokksins og Sjálfstæðisflokksins samkvæmt heimildum Samstöðvarinnar. „Fólk þorir ekki að styðja þessar hugmyndir opinberlega af ótta við að allt verði vitlaust, en allir sjá að eitthvað þarf að gera,“ segir varaþingmaður í stjórnarmeirihlutanum.
Samstöðin hefur sent Birni Brynjúlfi fyrirspurn og falast eftir ræðu hans.
