Áfram krauma eldkatlar undir Reykjanesi en Veðurstofa Íslands lýsir yfir hættustigi í hættumati sínu í dag.
Mikið hefur verið minnst á það í fréttum undanfarnar vikur að líkur aukist smám saman á nýju gosi á næstunni og virðast þær áhyggur sérfræðinga magnast með degi hverjum. Hjördís Guðmundsdóttir, samskiptastjóri almannavarna, talaði við mbl.is og sagði það hættustig vera fyrst og fremst vegna rúmmálsins undir Svartsengi. Það sé „komið á það stig að það er talið að stutt sé í eldgos, en það getur enginn sagt hvenær, hvort og hvar það verður,“ sagði Hjördís.
Á vefsíðu Veðurstofunnar má lesa eftirtaldar ástæður fyrir vaxandi áhyggjum í hættumati gærdagsins:
- Landris heldur áfram og hefur kvikusöfnun undir Svartsengi verið nokkuð stöðug ef horft er til síðustu vikna
- Talið er að á bilinu 13 til 19 milljón rúmmetrar af kviku þurfi nú að bætast við undir Svartsengi frá síðasta gosi til að koma af stað nýju kvikuhlaupi og jafnvel eldgosi.
- Samkvæmt líkanreikningum er líklegast að magnið sem bæst hefur við frá síðasta eldgosi nálgist 16 milljónir rúmmetra á næstu dögum
- Hættustig hefur verið hækkað í ljósi nýjustu gagna og sviðsmyndir uppfærðar
Undanfarna daga hafa viðvörunarbjöllur einnig hringt vegna Grindavíkur, en líkurnar á því að gossprunga komi upp í miðjum bænum eru meiri en áður.
Þá segir á vef Veðurstofunnar að líkur séu á kvikuhlaupi eða jafnvel eldgosi á næstu tveimur til þremur vikum.
