Á miðvikudag (24. júlí) flutti Benjamín Netanjahú forsætisráðherra Ísrael ræðu fyrir Bandaríkjaþingi. Þetta er í annað skiptið sem hann gerir slíkt, en síðast þegar hann gerði það var árið 2015.
Hann fékk standandi lófaklapp í 4 mínútur samfleytt þegar hann gekk inn í þingsalinn, og klappað var fyrir honum um 40 sinnum á meðan ræðunni stóð, að meðaltali einusinni á hverri mínútu. Netanjahú gat varla klárað eina setningu án þess að byrjað væri að klappa fyrir honum.
Fréttaveitan Al Mayadeen hefur komið með greiningu á ræðunni þar sem kemur fram að af þeim 40 mínútum sem Netanjahú stóð við púltið og flutti ræðuna, voru 10 mínútur og 55 sekúndur lófaklapp og fagnaðarlæti. Sem þýðir að 27% eða fjórðungur af allri ræðunni var einungis lófaklapp.
Ræðan var yfirfull af lygum, ósannindum og áróðurskenndum talpunktum frá upphafi til enda.
Hér er listi yfir nokkur af þeim ósannindum sem Netanjahú hélt fram í ræðunni:
Um Íran og mótmælendur í Bandaríkjunum
- Netanjahú sagði mótmælendur í Bandaríkjunum sem mótmæla þjóðarmorðinu á Gasa vera „pro-Hamas“ og „standa með illum öflum“.
- Hann sagði Íran fjármagna (og þar með standa að baki) mótmælendum í Bandaríkjunum.
- Hann sagði mótmælendur vera „nytsamlega vitleysinga“ (useful idiots) fyrir „harðstjóranna“ í Íran, sem hann sagði að „hengi samkynhneigða“ og „myrði konur fyrir að vera ekki með slæður“.
- Hann gaf einnig í skyn að Íran hafi átt þátt í morðtilræðinu gegn Donald Trump.
Um atburðina 7. október
- Netanjahú endurtók áróðurslygarnar um atburðina 7. október. Þetta „atrocity propaganda“ hefur þann tilgang að réttlæta yfirstandandi morðherferð á Gasa sem hefur orðið um 40.000 óbreyttum borgurum að bana, mest konum og börnum.
- Hann sagði Hamas-liða hafa „nauðgað konum“ og „brennt börn lifandi“. Engar sannanir hafa verið lagðar fram fyrir þessum fullyrðingunum um brennd börn. Þá hafa fullyrðingar um nauðganir einnig verið dregnar í efa. En það hefur verið ansi erfitt fyrir Hamas-liða og aðra vígamenn að nauðga konum á sama tíma og þeir voru í skotbardaga við Ísraelsher, þar sem 1.609 þeirra voru drepnir (samkvæmt Ísrael), þ.e. fleiri heldur en þeim tókst að drepa Ísraelsmegin. Kannski dóu svona margir þeirra vegna þess að þeir voru svona uppteknir að nauðga konum í staðinn fyrir að skjóta til baka? Að því er virðist, samkvæmt frásögn Netanjahú og yfirvalda í Ísrael.
- Netanjahú sagði „Hamas-hryðjuverkamennina“ hafa „drepið 1.200 manns“ í Ísrael. Þetta er lygi. Vegna þess að það hefur verið staðfest (m.a. af einu virtasta dagblaði Ísrael, Haaretz) að Ísraelsher beitti Hannibal-tilskipuninni svokölluðu þann 7. október, og drap sína eigin borgara á þessum degi með gríðarlegri skothríð og sprengjuregni, í því skyni að koma í veg fyrir gíslatöku. Þess vegna er það ekki satt að Hamas hafi drepið allt þetta fólk. Ísraelsher drap einnig hluta af þessum 1.200 manns sem létust Ísraelsmegin þennan dag (ásamt 1.609 Hamas-liðum og öðrum vígamönnum frá Gasa).
Um stefnu Ísrael gegn Palestínumönnum og morðherferðina á Gasa
- Netanjahú sagði Ísrael ekki vera að svelta Gasa. Hann sagði að Ísrael hefur hleypt nægum mat inn á Gasa, vandamálið er bara að Hamas steli matnum frá fólkinu.
- Hann sagði Ísrael ekki vera rasískt. Þrátt fyrir vel þekkta apartheid-stefnu sem stjórnvöld í Ísrael reka gegn Palestínumönnum, eins og hefur verið fjallað um í skýrslum mannréttindasamtaka eins og Human Rights Watch, Amnesty International og B’Tselem.
- Þá sagði Netanjahú í ræðunni að átökin í Miðausturlöndum, þ.e. átökin milli Ísrael og Palestínu, væru átök á milli „siðmenningarinnar“ og „villimennsku“. Er það ekki rasismi að afmennska Palestínumenn, Múslima og Araba með því að kalla þá „ósiðmenntaða villimenn“?
Þetta er ekki einusinni tæmandi listi. Bara það helsta sem höfundi tókst að tína saman.
Í nánast hvert skipti sem Netanjahú lét þessar lygar og ósannindi út úr sér, sem hér hafa verið talin upp, var honum fagnað með lófaklappi í þingsalnum. Margir hafa bent á hversu ógeðfellt þetta sjónarspil var.
Þingmenn Demókrata sniðgengu ræðuna
Axios greinir frá því að um helmingur þingmanna Demókrata hafi sniðgengið ræðuna. Það eru talsvert fleiri en þeir 58 þingmenn Demókrata sem sniðgengu ræðu Netanjahú á Bandaríkjaþingi árið 2015.
A.m.k. einn þingmaður Repúblikana, Thomas Massie, ákvað einnig að sniðganga ræðuna.
Þingkonan Alexandria Ocasio-Cortez útskýrði það á Twitter að ástæðan fyrir því að þingsalurinn var fullur þrátt fyrir að helmingur þingmanna Demókrata var ekki viðstaddur, var sú að skipuleggjendur viðburðarins fengu annað fólk (væntanlega dygga stuðningsmenn Ísrael og Netanjahú) til að fylla sætin í staðinn fyrir þingmennina sem voru fjarverandi, til að láta það líta út eins og þingsalurinn væri fullsetinn.
Nokkrir þingmenn andsnúnir Netanjahú ákvaðu samt sem áður að mæta í þingsalinn í staðinn fyrir að sniðganga ræðuna. Sú fremsta í þeim flokki er Rashida Tlaib, en hún er ein af tveimur múslimskum þingkonum á Bandaríkjaþingi (ásamt Ilhan Omar), og eini þingmaðurinn sem er af palestínskum ættum. Hún, ásamt Ilhan Omar, Ayanna Pressley, og Alexandria Ocasio-Cortez, eru kallaðar „The Squad“, sem þykja vera vinstrisinnuðustu þingmennirnir á Bandaríkjaþingi.
Á meðan ræðu Netanjahú stóð klæddist Rashida Tlaib Keffiyeh-klút með palestínska fánanum, og hélt á skilti þar sem stóð á einni hlið „guilty of genocide“ og „war criminal“ á hinni.
Myndir af Rashida Tlaib hafa farið eins og eldur um sinu á samskiptamiðlum.
Mótmæli fyrir utan þinghúsið
Á meðan ræðunni stóð voru mikil mótmæli í Washington fyrir utan þinghúsið.
Lögreglan beitti piparúða og táragasi gegn mótmælendum.
Samkvæmt NBC News voru sex ættingjar gíslanna á Gasa handteknir eftir að þeir mótmæltu Netanjahú inni í þingsalnum. Þeir vilja að hann semji við Hamas sem fyrst um að láta gíslanna lausa, sem Netanjahú neitar að gera.
Í framhaldi af ræðunni á miðvikudag fundaði Netanjahú með Joe Biden Bandaríkjaforseta og Kamölu Harris varaforseta á fimmtudag, og með Donald Trump forsetaframbjóðanda Repúblikanaflokksins á föstudag.
