„Það er þarft að koma þessu aftur efst á blað. Þetta er þriðji þátturinn hjá Kveik um mansal og því tengdu. Um það hvernig vinnumarkaðurinn er óheilbrigður. Best væri ef pólitíkusar myndu drullast til að gera eitthvað en ekki bara tala um þetta.“
Þetta segir Adam Kári Helgason, eftirlitsfulltrúi Fagfélaganna og Eflingar, í samtali við Rauða borðið sem sýnt verður í kvöld. Þar mun hann ásamt Sögu Kjartansdóttur, sérfræðingi á lögfræði- og vinnumarkaðssviði ASÍ, Gundegu Jaunlinina, varaformanni Verkalýðsfélagsins Hlífar og Margréti Steinarsdóttur, framkvæmdastjóra Mannréttindaskrifstofu Íslands ræða vinnuframsal, starfsmannaleigur og brot á réttindum launafólks.
Adam Kári vísar í þátt Kveiks um mansal sem sýndur var í gær. Hann segist helst hafa hugsað við áhorf á þann þátt, hvers vegna ekkert sé gert við þessum vanda, þrátt fyrir að ítrekað hafi verið bent á hann. „Það hefur mjög lítið breyst, eins og með starfsmannaleigurnar, það var skrifað undir samkomulag fyrir mörgum árum síðan milli ASÍ og SA um að setja upp einhverskonar gæðakerfi og þá sérstaklega fyrir starfsmannaleigur. Það hefur ekkert æxlast. Einkaaðilarnir reyndu að gera þetta við ferðaþjónustuna en þeim fannst heldur erfitt að verða við kröfum ASÍ og stéttarfélaga að hafa sín mál í lagi gagnvart kjarasamningum og sínu fólki. Og það féll bara um sjálft sig.
Við Rauða borðið í kvöld má sjá og heyra samtal um mansal á Íslandi.
