Victoria Bakshina, háskólanemi og íslenskukennari, segir að yfirlýsing Pútíns Rússlandsforseta um herkvaðningu 300 þúsund manns hafi verið áfall. Bróðir hennar sjái nú fram á að vera sendur á vígvöllinn. Og viðbrögð marga ungra manna voru að reyna að koma sér úr landi. Viðurlög við að koma sér undan herskyldu voru áður sektir en nú geta menn verið dæmdir í tíu ára fangelsi.

Victoria segist ekki getað metið hvort ræða Pútíns og ákvarðanir eigi eftir að draga úr stuðningi við hann eða jafnvel auka hann. Henni hafi komið á óvart í vor hversu mikinn stuðning Pútín hafði. Hún hafi fundið fyrir honum í samtölum sínum við fólkið hennar í Rússlandi og því ekki efast um kannanir sem sýndu að um 84% Rússa studdu Pútín og stríðið, sem þá mátti reyndar ekki kalla stríð heldur aðeins sérstaka hernaðaraðgerð.

En nú má kalla þetta stríð. Pútín lýsti því yfir að Vesturlönd væru komin á árásarstríð gegn Rússlandi og því þyrftu Rússar að verjast. Þrátt fyrir þessar yfirlýsingar segir Victoria að Pútín hafi virkað veikt í ávarpinu. Hann hafi áður alltaf virkað sterkur, eins og hann væri út járni, en nú hafi hann alls ekki birst þannig.

Aðspurð um áhrif viðskiptaþvingana á daglegt líf Rússa sagði Victoria að þau væru lítil hjá hennar fólki sem byggi í Síberíu. En vinir hennar í Moskvu töluðu um verðhækkanir og vöruskort, til dæmis að það vantaði viss lyf.

Samtalið við Victoriu má sjá og heyra í spilaranum hér að ofan.

Samstöðin er umræðu- og fréttavettvangur sem studdur er af almenningi í gegnum Alþýðufélagið. Ef þér líkar efni Samstöðvarinnar getur þú eflt hana með því að gerast einskonar áskrifandi sem félagi í Alþýðufélaginu. Þú getur skráð þig hér: Skráning félaga