Ísraelska dagblaðið Haaretz greinir frá því að ísraelsk stjórnvöld nýti sér stríðið á Gaza til að breiða yfir frekari uppbyggingu landránsbyggða á palestínsku landi á Vesturbakkanum og í Austur-Jerúsalem. Samkvæmt Ir Amim samtökunum ísraelsku, sem meðal annars vakta uppbyggingu landránsbyggða, hafa framkvæmdir við 17 landránsbyggðir hafist frá 7. október. Allt í allt er um að ræða uppbyggingu 8.000 íbúða. 

Að minnsta kosti 42 Palestínumenn féllu í sprengjuregni ísraelska flughersins á Rafah, síðustu borgina á Gaza-ströndinni sem Ísraelar hafa ekki hertekið. Fjöldi flóttafólks í borginni fer sívaxandi þrátt fyrir stanslausar sprengjuárásir. Nú eru um það bil 1,4 milljónir Palestínumanna í borginni og þar af um helmingur börn. 

Ísraelski herinn sækir staðfastlega í suðurátt á Gaza-ströndinni og hyggur á innrás á landi inn í Rafah. Sameinuðu þjóðirnar, Evrópusambandið, Bandaríkin og Arababandalagið hafa öllu biðlað til Ísraela um að láta ekki verða af fyrirhuguðum landhernaði. Ef ísraelski herinn ræðst á borgina muni það valda mannúðarkrísu af áður óþekktum skala og enda með óheyrilegu blóðbaði óbreyttra borgara. Palestínumenn í Rafah geti hvergi flúið. 

Þá hafa Hamas-samtökin lýst því að ráðist Ísraelar á Rafah af landi muni það binda enda á allar viðræður um lausn gísla í haldi samtakanna. 

Að minnsta kosti 112 Palestínumenn hafa fallið síðasta sólarhringinn á Gaza. Yfir 28 þúsund Palestínumenn eru nú fallnir og tæplega 68 þúsund særðir síðan Ísraelar hófu árásarstríð sitt á Gaza 7. október. 

Ísraelski herinn hefur haldið Al-Amal sjúkrahúsinu í borginni Khan Younis í herkví svo vikum skiptir. Palestínski Rauði hálfmáninn hefur nú greint frá því að að Ísraelar hafi komið í veg fyrir að súrefniskútar séu fluttir á sjúkrahúsið í yfir vikutíma. Það hafi valdið dauða þriggja sjúklinga.