Þeir sem búa yfir sveigjanleika í eigin lífi og geta stokkið af stað til nýrra ævintýra án nokkurs fyrirvara geta gert ansi góð kaup þessa dagana. Það á jafnt við um ferðaþjónustu innanlands sem og ýmis túristatilboð utan landsteinanna.

Mun færri erlendir ferðamenn eru á sveimi um Ísland en ráð var fyrir gert og eru dæmi um að afbókanir og óhagstætt veðurfar hafi leikið íslensk ferðaþjónustufyrirtæki svo grátt að þau bjóði upp á brunatilboð á mat og gistingu.

Dæmi eru um að hótel auglýsi tveggja manna gistingu með þriggja kvöldverði sem kosti pör innan við 30.000 krónur. Þarf að fara langt aftur í tímann til að finna önnur eins tilboð á þessum árstíma sem alla jafna er langdýrasti tími ársins.

„Svona tilboð sá maður helst í covid eða yfir vetrartímann,“ segir vert á hóteli úti á landi sem reynir allt hvað hann getur til að selja út herbergi og kvöldmat með ýmsum gylliboðum.

Þá hefur vakið athygli að utan landsteinanna hafa ferðaskrifstofur boðið landsmönnum upp á mjög ódýr flug og ódýra gistingu á suðlægum og heitum slóðum síðustu daga.

Samkvæmt auglýsingum á samfélagsmiðlum má finna flug til evrópskra stórborga og gistingu á 5 stjörnu hóteli undir 60.000 krónum, allt að vikudvöl.