Gunnlaugur Ingvarsson, formaður Frelsisflokksins og áður oddviti Íslensku þjóðfylkingarinnar í Reykjavík, var á fremsta bekk þegar Jón Gunnarsson hélt ræðu í Valhöll í gær. Efni ræðunnar var útlendingamál. Jón birtir mynd á Facebook af fundinum sem sjá má hér fyrir ofan.

Jón skrifar: „ Vel sóttur fundur í Valhöll í gær þar sem ég fór yfir stöðuna í útlendingamálum. Ég mun núna á vorþinginu leggja fram frumvarp sem rýmkar dvalar- og atvinnuleyfi fyrir einstaklinga utan EES-svæðisins, með það að markmiði að auka samkeppnishæfni Íslands og laða hingað hæft starfsfólk.“

Á dögunum kom Jón útlendingafrumvarpi sínu í gegnum þingið en allir stjórnarþingmenn, þar með taldir þingmenn VG, kusu með því. Jón virðist vilja ganga enn lengra. Hann heldur áfram í fyrrnefndri færslu og skrifar: 

„Enn er þörf á meiri úrbótum á útlendingalöggjöfinni þegar það kemur að málefnum umsækjenda um alþj. vernd en Ísland tekur hlutfallslega á móti hvað flestum umsóknum í Evrópu. Þar spilar stóran þátt að löggjöf okkar er frábrugðin því sem gengur og gerist í löndunum í kringum okkur.“

Líkt og fyrr segir má sjá Gunnlaug á fremsta bekk að hlusta á Jón í Valhöll. Hann hefur tekið þátt í tveimur stjórnmálahreyfingum sem ekki er hægt að lýsa öðru vísi en sem rasistaflokkum. Helstu, og nánast einu, áherslur beggja flokka snerust um útlendingaandúð. Frelsisflokkurinn vildi banna mosku í Reykjavík en einnig greiða um fyrir einkabílnum. Gunnlaugur starfar sem leigubílsstjóri.

Gunnlaugur var til viðtals á RÚV árið 2018 þegar hann tilkynnti framboð flokksins í borgarstjórnarkosningum. „Við viljum ekki að Reykjavík verði hælisgreni, við viljum byggja upp góða borg og íbúðir fyrir alla. […] Við viljum að íslenskri menningu sé gert hátt undir höfði og við erum stolt af því að vera Íslendingar og viljum vera það  en við höfum ekkert á móti útlendingum, ekkert,“ var haft eftir Gunnlaugi á blaðamannafundi sem flokkurinn hélt fyrir utan Ráðhúsið.