Jóhann Hauksson, formaður Íslandsdeildar Transparency International, segir í pistli sem hann birtir á Facebook að Guðmundur Björgvin Helgason ríkisendurskoðandi sé ekki embættismaður í þjónustu almennings heldur virðist hann þjóna Bjarna Benediktssyni, formanni Sjálfstæðisflokksins og fjármálaráðherra. Jóhann segir afstöðu hans í Lindarhvolsmálinu furðulega og sýna hverjum hann þjónar.

Hér fyrir neðan má lesa pistil Jóhanns í heild sinni.

Ofstækisfull afstaða núverandi ríkisendurskoðanda, Guðmundar Björgvins Helgasonar, gegn rétti almennings til upplýsingar í Lindarhvolsmálinu er furðuleg. En hún upplýsir að hann er ekki embættismaður í þjónustu almennings heldur þjónar hann sínum herrum, sem réðu hann til verka sem ríkisendurskoðanda. Upphaflega var hann ráðinn til Guðna Ágústssonar þáverandi landbúnaðarráðherra árið 2000 og þjónaði honum í sjö ár. Nú er hann ríkisendurskoðandi og ráðinn af Alþingi Íslendinga en virðist þjóna Bjarna Benediktssyni og stjórnarliðum í Framsóknarflokknum, auðsveipur þeim sem sköffuðu honum fína vinnu.

Hvernig getur maður í embætti sem sérstaklega á að þjóna almennningi og skattgreiðendum og hafa á eftirlit með þvi að vel sé farið með almannafé gengið fram með slíkum hætti? Ég veit að stofnandi Sjálfstæðisflokksins, Jón Þorláksson sagði á prenti 1928 að engum væru veitt lyklavöld að ríkisféhirslum til að greiða úr þeim vinargjafir eða fylgdarlaun.

Þessi maður virðir regluna „æ sér gjöf til gjalda“ og greiðir nú fyrir sig með ofstopa gegn skattgsreiðendum í þágu Bjarna Ben og annarra stjórnarliða með því að hamast gegn því að Lindarhvolsskýrsla Sigurðar Þórðarsonar verði birt.

Þetta er fumstætt og spillt. Meira að segja vígi almennings sem eiga að verja skattgreiðendur gegn ofríki framkvæmdavaldsins eru „infiltreruð“ mönnuð einhverjum leiguliðum stjórnarherranna.

Svei þessu.