„Ég nenni ekki að standa í þessu. Ég er hér þreklaus af veikindum og mér finnst það alveg nóg. Mér finnst þetta heimska, má veikt fólk ekki gera neitt fyrir börnin sín? Það eru að koma þrjú ár síðan ég fékk íbúðina og af hverju allt í einu núna sem heimilisuppbót er tekin?“
Þetta skrifar Valgerður Margrét Gunnarsdóttir á Facebook en hún greinir frá því þar að hún fær ekki lengur húsaleigubætur. Hún hafði unnið sér það til saka að vilja hjálpa syni sínum að koma undir sig fótunum. Valgerður er með krabbamein og fékk íbúð frá ríkinu vegna veikinda.
„Ég er með aukaherbergi fyrir yngsta son minn, sem er hörkuduglegur, búinn með rennismíði og er á öðru ári í vélstjórn. Hann vill ekki taka námslán og vinnur inn á milli til að geta veitt sér smá. Ég þarf allavega aldrei að hafa áhyggjur af honum, hann er það duglegur. En núna er búið að taka heimilisuppbót af mér, sem er um 40.000 kr á mánuði af því að hann er skráður heima hjá mér,“ segir Valgerður.
Hún segir að sér muni talsvert um þennan pening. „Ég skil ekki alveg af hverju þetta er gert allt í einu núna. Ég fékk aukaherbergi fyrir hann, af því hann er í skóla, ég skil þetta ekki. Mér munar um 40.000 krónur, er búin að vera á sjúkrahúsi í næstum þrjá mánuði og kemst sennilega ekki út fyrr en með haustinu. Ég þarf að borga auðvitað leigu og rafmagn, hita og net. En í alvöru þarf ég að skrá son minn á annað heimilisfang og ljúga til að halda þessum lágmarksbótum? Samt létu þeir mig fá aukaherbergi svo sonur minn gæti verið í skólanum,“ segir Valgerður.
