Nær öll skráð fyrirtæki sem eru skráð í Kauphöll Íslands hafa lækkað í dag. Nú í hádeginu var heildarveltan á markaðinum um 1,1 milljarðar. Viðskiptablaðið greinir frá þessu.
Eina fyrirtækið sem stendur í stað er fasteignafélagið Reginn. En fyrir utan það þá lækka flest öll fyrirtæki talsvert. Alvotech lækkar mest, eða um 7,84 prósent, í 155 milljón króna viðskiptum.
Í nótt var greint frá því að lyfjaeftirlit Bandaríkjanna hafi hafnað Alvotech í annað sinn. Nánar má lesa um það hér.
Fjárfestingafélagið Skel hefur í dag lækkað um 3,33 prósent í 39 milljón króna viðskiptum. Sýn lækkar einnig talsvert, um 2,35 prósent í 141 milljón króna viðskiptum.
Íslandsbanki heldur áfram að lækka, þrátt fyrir að hafa hækkað lítillega í gær eftir að það var tilkynnt að Birna Einardóttir, fyrrverandi bankastjóri, myndi fjúka. Í dag hefur bankinn lækkað um 1,80 prósent í 55 milljón króna viðskiptum.
Ölgerðin lækkar einnig um 1,67 prósent í 130 milljón króna viðskiptum. Gengi Síldarvinnslunar lækkar einnig en þó minna en hjá hinum, það hefur lækkað um 0,44 prósent í 20 milljón króna viðskiptum.