Öryrkjabandalag Íslands hefur sent út tilkynningu þar sem það skorar á sýslumannsembættið á Suðurnesjum, ásamt sveitarfélagið Reykjanesbæ, að taka til endurskoðunar ákvörðun um að selja á nauðungaruppboði hús Jakub Polkowski, eða Kuba, ungs fatlaðs manns langt undir markaðsverði.

Sýslumaður, Ásdís Ármannsdóttir, ákvað að taka tilboði í hús hans á nauðungaruppboði. Var verðið uppá einn tuttugasta af markaðsvirði hússins. Kuba borgaði 44 milljónir út árið 2018, og er húsið í dag metið á 57 milljónir. Er um 155 fermetra hús að ræða.

Tilboðið sem sýslumaður samþykkti hljóðaði hinsvegar uppá 3 milljónir. Kom nauðungaruppboðið til eftir að maðurinn lenti í alvarlegum vanskilum. Sagðist maðurinn, í viðtali við RÚV, ekki hafa vitað að hann ætti að borga. Hann taldi sig hafa verið búinn að borga húsið og ætti það.

Útburði hans var frestað í gær, en hann verður þó í lok vikunnar.

Eins og segir í tilkynningu Öryrkjabandalagsins:

Það er forkastanlegt að hvorki félagsþjónusta sveitarfélagsins né sýslumannsembættið hafi gripið inn í áður en húsið var selt á nauðungaruppboði á einungis þrjár milljónir, eða um 5% af markaðsvirði hússins.

Í lögum um nauðungarsölu segir að telji sýslumaður tilboð sem koma til álita „svo lág að fari fjarri líklegu markaðsverði eignarinnar“ geti hann ákveðið að uppboðið verði haldið á ný. Það var ekki gert þrátt fyrir óeðlilega lágt söluverð.

ÖBÍ réttindasamtök skora því á bæði sýslumannsembættið og sveitarfélagið að taka málið til endurskoðunar og tryggja velferð mannsins og húsnæðisöryggi í hans eigin eign. Sömuleiðis er nauðsynlegt að farið sé yfir alla verkferla í málinu til að tryggja að slíkt endurtaki sig ekki. ÖBÍ réttindasamtök hvetja jafnframt kaupandann til að hverfa frá kaupunum, nú þegar ljóst er hvernig í málinu liggur.

Myndin er úr frétt RÚV, af Ásdísi Ármannsdóttur, sýslumanni á Suðurnesjum, þegar hún kom úr húsi Kuba eftir að hafa selt það undan honum.