Þórarinn Leifsson, rithöfundur, listamaður og leiðsögumaður, deildi færslu Einars Sveinbjörssonar veðurfræðings um stöðu jarðhræringanna á Reykjanesi nú á föstudag og sagði: „Ég er sjálfur með bókaðan hóp þarna á sunnudaginn næsta. Það fyndna er að ég fæ borgað fyrir að fara með ferðamenn í bláa vatnið en færi ALDREI með mín eigin börn. Nú þarf ég að fylgjast vel með …“

Færsla veðurfræðingsins, sem fylgir þessum ummælum Þórarins, snerist um hversu ólíkt gos á þessum stað gæti orðið þeim sem íbúar á svæðinu hafa vanist undanliðin ár. Jarðsjórinn sem er einkennandi í berggrunni Reykjanesskagans nær ekki inn í eldstöðvakerfi Fagradals, skrifar hann, að minnsta kosti ekki undir Fagradalsfjall, þar sem áður hefur gosið. „Enda kom á daginn að þegar kvikan braut sér leið í mars 2021, var gosið hreint flæðigos, engar gufusprengingar eða gjóskufall sem afleiðing af snertingu kviku við vatn.“

Einar segir að lóðrétta kvikustreymið sem nú mælist í Eldvörpum og Svartsengi muni „fyrr en síðar ná upp í jarðsjóinn sem vissulega er mjög heitur fyrir og líka grunnurinn að jarðhitavirkjuninni í Svartsengi.“

„Ef ég ætti að velja um gistingu …“

Vinnuholur Svartsengis eru flestar, segir hann á milli 400 og 1.900 metra djúpar. Ofan á jarðsjónu liggi síðan þunnt lag af ferskvatni, sem sé einnig dælt upp. „Lítið verið rætt um það, a.m.k. ekki út á við, hver áhrifin á jarðhitann verður ef og þegar kvikubráðin nær upp í jarðsjóinn. Svo ekki sé talað um við hverju megi búast nái kvikan til yfirborðs með gosi þar sem gnótt er af vatni í bergrunninum.“

Einar segir lítið hafa verið rætt um það hver áhrifin á jarðhitann verða ef og þegar kvikubráðin nær upp í jarðsjóinn – „svo ekki sé talað um við hverju megi búast nái kvikan til yfirborðs með gosi þar sem gnótt er af vatni í bergrunninum.“ Hann segir líklegt að „gos á þessum stað verði með talsvert öðrum brag, í það minnsta í fyrsta fasa þess, samanborið við eldgosin þrjú í og við Geldingadali.“

Blaðamaður heyrði í Einari í síma til að spyrja hann nánar út í þessa hættu. Lítur hann svo á að ummæli Þórarins séu við hæfi, að hann myndi ekki fara með börnin sín í Bláa lónið undir þessum kringumstæðum? Veðurfræðingurinn svaraði óbeint: „Ja, ég hef sagt að ef ég ætti að velja um gistingu, hvort ég gisti í hóteli í þeim hluta Súðavíkur sem er núna bannað að dvelja á vegna snjóaflóðahættu eða gista við Bláa lónið, þá myndi ég tvímælalaust velja Súðavík.“