Þó búið sé að rýma Grindavík og hraun hafi streymt inn í bæinn þá eru einhver gæludýr enn í bænum. Í dag var reynt að setja upp kattabúr fyrir villiketti sem vitað er um en einnig sóttu sumir Grindvíkingar gæludýr. Þetta segir Soffía Sigurðardóttir sem var í dag á svokallaðri Grindavíkurvakt, ásamt mörgum öðrum. Í færslu á Facebook fer Soffía yfir þau verkefni sem þessi vakt hefur sinnt, en sumir hafa velt því fyrir sér hvers vegna ákveðið fólk fái að fara inn á þetta svæði sem öllum öðrum hafi verið bannað að fara inn á af öryggisástæðum.
„Já, það er ekki hættulaust að vera í Grindavík núna, en með öryggisviðbúnaði er hægt að halda áhættu innan ásættanlegra marka. Þessi viðbúnaður dugði til að í gær væri hægt að sinna ofantöldum verkefnum. Hann dugði hins vegar ekki til að taka á móti meiru á sama tíma og þar á meðal þeim mörgu íbúum Grindavíkur sem vildu sinna eigum sínum og heimilum. En, það mun koma að því,“ skrifar Soffía.
Hér fyrir neðan má lesa upptalningu Soffíu á helstu verkefnum Grindavíkurvaktarinnar.
– Slökkviliðsmenn og björgunarsveitarfólk frá Borgarnesi til Árnessýslu mönnuðu stjórneiningar.
– Liðsmenn þeirra fylgdu líka öðru starfsfólki eftir, voru viðbragðsliðar með talstöðvar og gasmæla sem vara við gasmengun.
– Fylgdu líka fjölmiðlafólki sem kom í tveimur hópum inn á svæðið og einnig örfáum einstaklingum sem fengu að koma inn til að sækja gæludýr og setja upp kattabúr fyrir villiketti sem vitað var um.
– Mönnuðu einnig, ásamt starfsfólki Öryggismiðstöðvarinnar, eftirlitsstöðvar með því hverjir kæmu inn á svæðið.
– Slökkviliðin mættu með tankbíla og dælur og dældu upp vatni þar sem komast þurfti að leiðslum til að sinna viðgerðum.
– Þeir sinntu líka tilkynningum frá öryggisfyrirtækjum um boð frá margvíslegum viðvörunarkerfum.
– Starfsfólk HS veitna, Landsnets og Mílu vann að því að tengja leiðslur sem höfðu rofnað og leita að bilunum í veitukerfum.
– Stórir flutningabílar komu hlaðnir stórum og smáum rörum.
– Fjölmennur hópur frá mörgum lagnaþjónustum, okkar ómissandi píparar, fóru hús úr húsi og tryggðu að á þeim héldist hiti og væri ekki vatnsleki.
– Rafvirkjar þurftu að sinna viðgerðum hér og þar til að koma rafmagni á svo margt sem þarf að virka, bæði rafstrengjum í jörðu og búnaði inni í húsum.
– Landmælingamenn frá verkfræðistofum voru ásamt sérsveit ríkislögreglustjóra með dróna til að mæla mannvirki og færslur lands, lyftingar, sig og hliðrun.
– Vinnuvélastjórar fluttu efni og mokuðu upp í varnargarða.
– Rétt fyrir utan Grindavík mætti starfsfólk á hótel og eldaði hédegismat handa þeim sem voru við störf inni í bænum.
– Frá örfáum aðilum fengu fáeinir starfsmenn að koma til að huga að sérhæfðum búnaði. Bæði í Grindavík og Svartsengi.
