Afstaða, félaga fanga, fullyrðir að sumir þeir sem hafa verið handteknir á Suðurnesjum eða frelsissviptir af lögreglunni undanfarið hafi verið látnir dúsa í mygluðu húsnæði lögreglunnar. Síðastliðin október greindi lögreglan á Suðurnesjum frá því að lögreglustöðinni við Hringbraut í Keflavík væri lokað vegna raka og myglu. Fjölmiðlar á Suðurnesjum þá einnig frá áformum lögreglunnar að nota fangaklefana áfram í mygluhúsinu, en óhætt er að segja að það hafi farið framhjá mörgum.

Afstaða birtir á Facebook fyrirspurn sem félagið sendi til heilbrigðiseftirlits suðurnesja vegna málsins fyrr í dag. Sú fyrirspurn er í raun mjög einföld, en félagið spyr hvernig það megi vera að sama húsnæðið geti verið heilsuspillandi fyrir einn hóp en í lagi fyrir annan hóp.

„Afstöðu, félags fanga og annarra áhugamanna um bætt fangelsismál og betrun hefur borist ábendingar um að lögreglan á Suðurnesjum hafi flutt starfsemi sína í Keflavík þar sem orðið hafi var við raka/myglu í húsnæði því sem lögregla hefur um árabil haft aðstöðu.  Þrátt fyrir að starfsemi lögreglu hafi verið færð virðist sem að enn séu í húsnæðinu vistaðir frelsissviptir einstaklingar, í fangageymslum húsnæðis sem hefur verið úrskurðað ónothæft – að öðru leyti. Reynist það rétt, verður ekki við það unað,“ segir í fyrirspurn félagsins.

Félagið óskar einnig eftir skýringu á því hvers vegna að eftirlitið lagði blessun sína á þetta. „Hér með er óskað eftir að Heilbrigðiseftirlit Suðurnesja upplýsi hvort, og þá hvers vegna, það hafi gefið heimild fyrir að fangageymslur í hinu annars ónothæfa húsnæði séu nýttar til að vista frelsissvipta einstaklinga? Farið er fram á að erindinu verði svarað eigi síðar en föstudaginn 12. janúar næst komandi.“