Eldgosin á Reykjanesi hraða þeim fyrirætlunum að leggja af Reykjavíkurflugvöll. Umfangsmikla íbúðabyggð ætti að reisa í Vatnsmýrinni þar sem flugvöllurinn hefur staðið.

Þetta segir hagfræðingurinn Gylfi Magnússon. Reykjavíkurflugvöllur hefur verið bitbein um áratuga skeið og yrði forvitnilegur snúningur ef eldgosin dæma flugvöllinn út af kortinu eins og meirihluti landsmanna hefur lengstum stutt.

Gylfi segir blasa við að jarðeldarnir kalli á nýja hugsun í skipulagsmálum. Óráðlegt sé að teygja höfuðborgarsvæðið lengra til suðurs, inn á vellina hjá Hafnarfirði eða í áttina að Hellisheiði. Þá blasi við að brýnna sé en áður að taka flugvallarsvæðið undir byggð. Eins fljótt og auðið verður.

„Flugvallarsvæðið er tiltölulega öruggt svæði með tilliti til jarðhræringa og auðvitað mjög hentugt byggingarland,“ segir Gylfi á facebook.

Reykjavíkurflugvöllur er að hans sögn enginn alvöru varaflugvöllur fyrir Keflavík. Hugsa mætti sér uppbyggingu nýs flugvallar á suðvesturhorninu í stað Reykjavíkurflugvallar.

Gylfi, sem er prófessor í hagfræði, kemst þó að þeirri niðurstöðu að hraðlest til Keflavíkur myndi leysa það skarð sem Reykjavíkurflugvöllur skilur eftir sig.