„Það verður að segjast eins og er að hljóðið er mjög þungt er kemur að grunnskólunum,“ sagði Þorgerður Katrín Gunnarsdóttir, formaður Viðreisnar á Alþingi í gær í umræðum um aukinn ójöfnuð í skólum hér á landi.
Hún vísaði til viðbragða skólastjórnenda í grunnskólum víða un land sem staðhæfðu miklar áskoranir. Samfélagsgerðin hefði breyst hratt á skömmum tíma og tónn skólastjórnenda væri þungur. Gæði menntunar á niðurleið samkvæmt Pisa-könnunum enda nái skólarnir ekki að sinna þörfum ólíkra hópa eins og Þorgerður Katrín orðaði það, sjálf fyrrum menntamálaráðherra.
Fram kom í umræðunum að fjölgun útlendinga úr 30. 000 í 70.000 á innan við áratuga án íslensku-eða inngildingaráætlunar væri mikil áskorun. Ísland kynni að missa skólana sem jöfnunartæki út úr höndunum.
Spurði Þorgerður Katrín forsætisráðherra hvort það að skipta menntamálaráðuneytinu í þrennt væri eina svar stjórnvalda.
Katrín, sem einnig gegndi stöðu menntamálaráðherra um skeið, svaraði að þessi málaflokkur þyrfti meiri athygli. Svo miklar samfélagsbreytingar hefðu orðið að ekki væri hægt að skrifa ábyrgð þeirra á einstaka ráðherra eða ríkisstjórn. Hlutfall innflytjenda hafi farið úr átta prósentum í 19 prósent á skömmum tíma. Pisa-kannanir sýni að börn innflytjenda standi verr en önnur börn.
„Við erum að ganga í gegnum tæknibreytingu sem hefur gerbreytt umhverfi barna er kemur að lesskilningi og friði til að sinna lærdómi í heimi þar sem áreiti er nú miklu meira en fyrir 10-15 árum,“ sagði Katrín og vísaði til snjallsímabyltingarinnar.
