Sá sem skrifar Orðið á götunni, nafnlausan skoðanapistil sem birtist reglulega í DV, telur að allir þrír stjórnarflokkarnir munu nú ræsa út sínar kosningavélar til að tryggja það að Katrín Jakobsdóttir nái kjöri sem forseti. Skoðanakönnun sem sýnir að Halla Hrund Logadóttir mælist nú með mest fylgi hafi vakið hrylling í baklandi flokkanna. Þetta sé þó ekki endilega líklegt til að hjálpa Katrínu. Í DV segir:
„Talið er að framboð Katrínar hafi gert mikil mistök með því að hleypa samstarfsfólki Bjarna Benediktssonar inn á gafl hjá sér. Það á ekki síst við um Friðjón Friðjónsson sem er einn af nánustu handlöngurum Bjarna. Fleiri eru nefndir til sögunnar sem munu einungis skemma fyrir.“
En Katrín er sögð eiga enn fleiri bandamenn sem gætu veitt henni aðstoð. Helstu sægreifa Íslands. „Framsóknarflokkurinn ræður einnig yfir öflugri kosningavél sem verður nýtt. Þá er hefð fyrir því að þessir tveir flokkar, Framsókn og Sjálfstæðisflokkurinn, hafa jafnan verið í sérflokki þeirra sem hafa geta sótt styrki til atvinnulífsins, einkum sjávarútvegs og landbúnaðar. Kosningabarátta er dýr. Munu sægreifarnir, sem notið hafa sérréttinda hinnar óvinsælu ríkisstjórnar Katrínar og Bjarna, nú láta til sín taka? Það er mun líklegra en hitt,“ segir í DV.
