Sendiherra Bandaríkjanna gagnvart Sameinuðu þjóðunum varaði í gær við yfirvofandi stórfelldu fjöldamorði í súdönsku borginni El-Fasher. Borgin er miðstöð mannúðaraðstoðar í Darfur-héraði í landinu.
Til þessa hefur borgin ekki fundið verulega fyrir stríðsátökunum sem geysa milli tveggja fylkinga hersins, SAF og RSF, sem berjast um völd í landinu. Síðan um miðjan mánuðinn hafa hins vegar borist fregnir af sprengjuárásum og bardögum í borginni og í nærliggjandi þorpum.
Linda Thomas-Greenfield, sendiherra Bandaríkjanna gagnvart SÞ, fullyrti á blaðamannafundi eftir fund Öryggisráðsins um málefni Súdans að El-Fasher væri á bjargbrún stórfellds fjöldamorðs. „Þetta eru ekki getgátur. Þetta er grimmur raunveruleiki sem milljónir standa frammi fyrir. Það eru þegar komnar fram trúverðugar frásagnir þess efnis að RSF og tengdir vígahópar hafi jafnað fjölda þorpa vestur af El-Fasher við jörðu, og sem ég stend hér, eru RSF að skipuleggja yfirvofandi árás á El-Fasher. Það yrður hamfarir á hamfarir ofan,“ sagði Thomas-Greenfield.
Milljónir Súdana eru á flótta eftir að átök brutust út milli fylkinganna tveggja, SAF undir stjórn hershöfðingjans Abdel Fattah al-Burham, og RSF undir stjórn Mohamed Hamdan Daglo hershöfðingja.
Sem fyrr segir er El-Fasher helsta miðstöð mannúðarstarfs og neyðaraðstoðar í vesturhluta Darfur-héraðs. Í borginni búa tæplega tvær milljónir manns, margir hverjir sem flúið hafa þangað í fyrri átökum og hörmungum í Darfur.
