Öll leyfi ísrelskra hermanna hafa verið afturkölluð vegna mögulegra viðbragða Írana eftir að loftárás Ísraela á ræðismannsskrifstofu í Damaskus varð fjölda manns að bana, þar á meðal einum af æðstu yfirmönnum íranska hersins. 

Í tilkynningu sem ísraelski herinn sendi út segir að í samræmi við mat á ástandinu hafi verið ákveðið að afturkalla öll leyfi tímabundið. Þá var greint frá því í gær að varliðsmenn hefðu verið kallaðir út til að auka á varnir Ísraels. Sömuleiðis hafa eldflaugavarnir Ísraela við norðurlandamærin verið auknar. 

Íranir hafa heitið því að hefna fyrir loftárásina en í henni féllu tveir hershöfðingjar og fimm hernaðarráðgjafar sem höfðu verið að störfum í Sýrlandi. Hinu sama hafa Hezbollah samtökin einnig heitið. 

Bandaríkin hafa þá sent skilaboð til stjórnvalda í Teheran um að þau hafi engan þátt átt í árásinni. Talskona varnarmálaráðuneytis Bandaríkjanna, Sabrina Singh, lýsti því að í ljósi þeirrar spennu sem er fyrir botni Miðjarðarhafsins hafi þótt ástæða til að gera það sérstaklega ljóst. 

Ekki er búist við að Íranir ráðist með beinum hætti á Ísrael. Öllu heldur er búist við að bandamenn Írana í Líbanon, Jemen, Sýrlandi og Írak verði fengnir til að auka á árásir sínar. 

Æðsti klerkur Írana, Ayatollah Ali Khamenei, sagði að zíónistastjórnin í Ísrael beitti nú blindandi aftökum til að bjarga höfði sínu. „Hinu illa zíónistaveldi verður refsað af hugrökkum hermönnum okkar. Við munum koma þeim til að iðrast þessa glæps, sem og annarra.“