„Ég átti orðastað við hæstvirtan dómsmálaráðherra í fyrradag í óundirbúnum fyrirspurnum um hinn víðtæka öryggisbrest sem liggur fyrir að hefur orðið hjá embætti héraðssaksóknara og jafnvel víðar, sem felst í því að ótalin gögn sem leynt eiga að fara og varða viðkvæmar persónuupplýsingar fjölmargra, ekki bara þeirra sem hafa haft réttarstöðu grunaðra fyrir meira en áratug síðan í málum heldur líka þeirra sem höfðu réttarstöðu vitna og fjölskyldumeðlima þeirra og jafnvel fleiri, liggja núna á skrifstofu Ríkisútvarpsins. Ég innti hæstvirtan dómsmálaráðherra eftir því hvað ráðherrann hefði gert í ljósi boðvalds síns og sem æðsti yfirmaður lögreglunnar til að reyna að ná utan um þessi mál, hvort það hefði verið haft samband við þetta fólk þannig að allt það fólk sem þarna er undir hafi verið upplýst um að þarna lægju upplýsingar um það, trúnaðarupplýsingar og persónulegar upplýsingar um það hjá RÚV,“ sagði Sigríður Á. Andersen, þingmaður Miðflokksins og fyrrverandi dómsmálaráðherra, á Alþingi í gær.

„Hæstvirtur dómsmálaráðherra upplýsti þingið um það að hún hefði ekki hugmynd um hvort þetta fólk hefði verið látið vita. Lög gera ráð fyrir því að haft sé samband við fórnarlömb mikils öryggisbrests samkvæmt persónuverndarlögum og samkvæmt löggjöf um meðferð persónuupplýsinga í löggæslutilgangi þannig að það er ekki að mínu mati ásættanlegt að ráðherra sem yfirmaður þessara mála hafi ekki hugmynd um hvernig í pottinn er búið í þessu.

Einnig spurði ég um hvort reynt hefði verið að ná utan um það hvað hefði verið gert til að komast yfir gögnin, til að ná þessum gögnum. Í ljósi þess að hæstvirtur dómsmálaráðherra virðist ekki hafa hugmynd um þetta þá vil ég beina því til háttvirtrar stjórnskipunar- og eftirlitsnefndar, sem hefur til meðferðar þetta mál, ýmsa anga þess, að bæta þessu við í umfjöllun sinni og kanna svo fljótt sem verða má hvernig búið er um þessa þætti sem ég nefni hér.“