Dr. Haraldur Sigurðsson jarðfræðingur hefur slegist í hóp vísindamanna sem síðustu daga segja lífsnauðsynlegt að stjórnvöld á Íslandi hefji markvissar aðgerðir til að minnka losun gróðurhúsalofttegunda.
Haraldur hefur um tíu ára skeið skrifað um grundvallar breytingar á Golfstraumnum og áhrif breytinganna í Norður Atlantshafi. Hann segir að árið 2015 hafi verið komin skýr merki um að hlýir hafstraumar (AMOC) sem streyma norður Norður Atlantshaf væru að hægja á sér, sem kynni að valda miklum loftslagsbreytingum í norðri.
„Þá var orðið nokkuð greinilegt meðal vísindamanna hvert stefndi. Síðan hefur ástandið stöðugt versnað, en höfuð orsök í þessu alvarlega máli er sívaxandi magn af koldíoxíði í andrúmsloftinu. um heim allan og hnattræn hlyjun sem stafar af því.“
Einn af höfundum á nýrri grein um þetta efni er Stefan Rahmsdorf.
„Áhrifin verða sennilega miklar breytingar á loftslagi, sjávarhita og hafstraumum í Norður Atlantshafi og er Ísland sennilega í miðpúnkti þessara hamfara á næstu öld, eða jafnvel næstu áratugi,“ skrifar Haraldur.
Hann bendir á að opinberlega hafi sáralítið verið fjallað um þetta mikilvæga efni á Íslandi.
„Mig grunar að ríkisstjórnin hafi nú áttað sig á því að málið er risastórt og mikilvægt, en þær vilja þegja í lengstu lög og vona að það hverfi á einhvern yfirnáttúrulegan hátt. Stingi hausnum í sandinn.“
Umhverfis- og Orkustofnun hefur nýlega birt upplýsingar um samfélagslosun á Íslandi, sem minnkar sáralítið á löngum tíma og eykst milli ára. Framreiknuð gögn sýna alltaf lækkandi gildi, en þau eru skáldskapur og aðeins pólitískur draumur að sögn Haraldar.
„Við munum öll minnast þess í framtíðinni að þessi og fyrri ríkisstjórnir á Íslandi hafa ekkert gert í því að draga verulega úr losun CO2 og er Ísland einn mesti sóðinn á þessu sviði,“ segir Haraldur.
