„Ég býst ekki við að fólk skilji hvað þetta er alvarlegt mál. Það er fátt sem er eins heilagt fyrir þingstörfin og fundarstjórn forseta,“ skrifar Björn Leví Gunnarsson um ákvörðun Hildar Sverrisdóttir, þingflokksformanns Sjálfstæðisflokksins, um að slíta þingfundi í gær, trúlega í óleyfi.

„Ég hef verið varaforseti Alþingis og skylda varaforseta er virðing gagnvart forseta, ræðumanni, þingsalnum og þinginu öllu. Ég hef setið á forsetastól sem forseti án þess að vita hvort ég væri að fara að slíta fundi eða ekki – af því að forseti sagði engum hversu lengi fundur átti að standa.

Persónulega finnst mér það fáránlegt, að forseti geti bara ekki sagt fólki það, þegar dagskráin er svona. Ekki einu sinni starfsfólki þingsins er sagt frá því. En þannig er starfið og ábyrgðin. Þingfundur er heilagur samkvæmt stjórnarskrá.

„Alþingi kýs sér forseta og stýrir hann störfum þess.“

Þannig að þegar varaforseti tekur sér dagskrárvald með því að slíta fundi í óþökk forseta þá er það beinlínis stjórnarskrárbrot – að mínu mati.

Þannig að þegar ég segi alvarlegt, þá meina ég svo alvarlegt,“ skrifaði þingmaðurinn fyrrverandi, Björn Leví Gunnarsson.