Skólamatur segist virkja neyðaráætlun sína í fyrsta sinn í 20 ára sögu fyrirtækisins sem er með starfsemi á Reykjanesi þar sem framreiddar eru máltíðir fyrir leikskóla- og grunnskólabörn í tugum skóla á Reykjanesi og á höfuðborgarsvæðinu.
Útvistun sveitarfélaga á heimsendum mat eða mat í grunn- og leikskóla er ekki óbrigðul en í nóvember lagði fyrirtækið Eldhús Akureyri skyndilega niður starfsemi sína. Skjólstæðingar velferðarsviðs Akureyrarbæjar fengu þá ekki allir hádegismat og þurfti sveitarfélagið að grípa til ýmissa ráðstafana.
Í dag er það veðrið sem hamlar því að matur komist til skila en helstu vegum suðvestanlands hefur verið lokað vegna færðar. Gul viðvörun er í gildi um nær allt land og appelsínugul viðvörun á Suðausturlandi og fólki ráðlagt að halda sig heim.
Skólamatur er í í samstarfi við birgja á höfuðborgarsvæðinu í dag svo hægt sé að þjónusta skólana að einhverju leyti en Jón Axelsson, framkvæmdastjóri Skólamatar, var enn staddur í bílaröð á Reykjanesbrautinni klukkan hálf eitt í dag í von um að vegurinn verði opnaður á ný með fylgd.
„Við erum búin að bíða í einn og hálfan tíma á hringtorgi í röð með 15 bílum sem ætla að athuga hvort þeir opni með fylgd eins og í morgun”, segir Jón í viðtali við RÚV. „Neyðaráætlun tvö verður virkjuð á morgun, við höfum aldrei virkjað þessa áætlun í 20 ára sögu fyrirtækisins. Þá erum við að vinna í því að fylla bílana af mat sem getur verið í kælingu í bílnum sem við getum dreift í fyrramálið.“
Sveitarfélögin selja mataráskrift frá Skólamat og munar stundum helming á verði á 10 miða korti. Mestur er munurinn á milli Kópavogs sem selur kortið á 4.945,- kr og Garðabæjar sem selur það á 8.653,- kr.
