Nokkur tímamót verða við lok þessa mánaðar við Laugaveg 76, við Laugaveg yfirleitt og jafnvel í miðborg Reykjavíkur allri, þegar Vinnufatabúðin lokar, eftir 83 ára samfelldan rekstur.

Tilkynnt var um lokun verslunarinnar á Facebook-síðu hennar á þriðjudagskvöld. Þar kemur fram að verslunin hefur verið óslitið í eigu sömu fjölskyldu allt frá upphafi. Í athugasemdum við tilkynninguna má sjá hlýhug fólks í garð verslunarinnar og ugg um þróun miðborgarinnar.

„Nei – það er ekki samþykkt!!!“ hrópar Erna nokkur. „Keypti mínar fyrstu tískubuxur hjá ykkur fyrir 50 árum ❤“ skrifar kona að nafni Sigrun Jensey, „Alltaf verið frábær verslun með gæða fatnað,“ segir maður að nafni Svanberg. „Það var alltaf gott að versla þar,“ segir Ásgeir og splæsir í hjarta. „Það er leitt, góðar vörur,“ segir Júlía. „Hef verslað þarna í 60 ár frábær verslun, takk fyrir mig,“ segir Jóhannes og bætir við röð af kenndum: 💙💙💙🤠😁😎🍾🥂. „Þvílík sorg“ heyrist, „Ofur leitt“ að viðbættu tárfellandi gulu höfði: 🥲. Sjónarsviptir, sorglegt, frábær búð, daprar fréttir, ykkar verður sárt sakna. „Æ en sorglegt þarna keypti ég mína fyrstu hermannaklossa og bomberjakka,“ skrifar Sonja, „Elska þessa búð.“ Hryggðarsvipur fylgir: 😔. „Takk fyrir mig elsku vinnufatabúð þín verður sko saknað“ og hjartað sem fylgir er glitrandi: 💖.

Að einhverju leyti virtist undravert að búðin skyldi enn vera þarna, umkringd rekstri sem hefur annars meira eða minna allur aðlagað sig að eftirspurn ferðamanna frekar en heimafólks. Og hugsanlega er það Pjetur St Arason sem nær best að fanga þróunina sem lokunin virðist vera hluti af, ef ekki síðasta innsiglið þá kannski það næstsíðasta. Pjetur skrifar:

„Kemur þá enn ein Lundabúðin á laugarveginn eða kannski einn bévítans barinn til, er ekki komið nóg af þessari viðleitni þeirra félaga Dýónísosar og Bakkusar að vilja drekkja okkur í bjór.“