Vinstri grænir eru sagðir sjóðandi reiðir yfir ræðu Áslaugar Örnu Sigurbjörnsdóttur, háskóla-, iðnaðar- og nýsköpunarráðherra. Líkt og Samstöðin greindi frá í gær þá hæddist hún að Svandísi Svavarsdóttur matvælaráðherra á svokölluðum Sjávarútvegsdegi, sem var á vegum helstu kvótakónga Íslands.

Sjá einnig: Áslaug reyndi að niðurlægja Svandísi fyrir fullum sal af kvótakóngum

Þessi ræða virðist ætla að draga dilk á eftir sér, því RÚV greinir frá því að VG-liðar séu gífurlega reiðir út í Áslaugu Örnu. Þeir eru sagðir furða sig á því að Áslaug rífi upp sár sem varla sé farið að gróa. Í allt sumar hafi í raun verið skotleyfi á Svandísi meðal Sjálfstæðismanna. En svo virtist sem þær öldur væru að lægja.

Svandís var ekki tilbúin að ræða atvikið við RÚV, en Bjarni Benediktsson, fjármálaráðherra og formaður Sjálfstæðisflokksins, var hins vegar til í það. „Ég þekki nú nákvæmlega ekki þessa gagnrýni. Ég var ekki á þessum fundi og veit ekki nákvæmlega hvað þú ert að tala um. En ég held að við ættum að tala af virðingu hvert um annað. Ég skal nú bara kynna mér það nákvæmlega í hvað verið er að vísa, ég bara þekki það ekki,“ hefur RÚV eftir Bjarna.