Þegar sóttvarnir gegn Covid-19 faraldrinum stóðu sem hæst vísuðu stjórnvöld í Bretlandi á bug ábendingum um grímunotkun barna þar sem þáverandi forsætisráðherra, Boris Johnson, og menntamálaráðherrann Gavin Williamson voru ekki „í stuði fyrir uppgjöf“ gagnvart stéttarfélögum kennara. Þetta kemur fram í WhatsApp-skilaboðum sem birt hafa verið í opinberri rannsókn Bretlands á viðbrögðum stjórnvalda við faraldrinum.

Í skilaboðunum kemur fram að Williamson hunsaði viðvaranir um öryggi vegna faraldursins í skólum, þar sem hann vildi ekki „láta eftir tommu“ gagnvart kennarafélögunum. Það var sumarið 2020.

Lagði líf í hættu til að skora stig

National Education Union (NEU), stærsta stéttarfélag kennara í Bretlandi, hefur brugðist harðlega við þessum afhjúpunum. Daniel Kebede, aðalritari félagsins, segir að afhjúpunin komi honum ekki á óvart heldur „staðfesti aðeins það sem kennara og foreldra grunaði allan tímann – að Gavin Williamson gæfi því að skora stig forgang yfir að mæta af alvöru fulltrúum hundruða þúsunda starfsfólk í menntakerfinu um bestu leiðirnar til að halda aftur af útbreiðslu Covid-19 í skólum.“

Þegar ráðherrann vísaði grímunotkun á bug höfðu fulltrúar NEU sent honum skriflegt erindi til að benda á það mikilvæga hlutverk sem grímur gætu leikið í að halda faraldrinum í skefjum innan skólakerfisins.

Regnhlífarsamtök stéttarfélaga, Trades Union Congress, segir ráðherra hafa gefið stjórnmálum forgang fram yfir fólk, á hættutímum. Kate Bell, aðstoðar-aðalritari samtakanna, segir: „Forystufólk í menntakerfinu vakti athygli á þörfinni á að vernda starfsfólk og börn í skólum. En þessum viðvörunum var vísað á bug af hefnigirni í garð stéttarfélaganna. Foreldrar, nemendur, starfsfólk skóla og almenning mun hrylla við að komast að því að líf voru lögð í hættu vegna þess að stjórnmálamenn voru í lágkúrulegum hefndarleik. Þetta má aldrei gerast aftur.“ Byline Times greindi frá.

Covid-19 rannsóknin í Bretlandi

Í Bretlandi fer nú fram opinber rannsókn á viðbrögðum stjórnvalda við Covid-19 fararldrinum. Boris Johnson, fyrrverandi forsætisráðherra, tilkynnti um rannsóknina vorið 2021, hún hófst ári síðar, og opinberar vitnaleiðslur hófust í sumar sem leið, júní 2023. Þær standa enn yfir.

Um leið og ákveðnar aðgerðir breskra stjórnvalda, á við samkomutakmarkanir, gengu umtalsvert lengra en samsvarandi aðgerðir á Íslandi, sættu bresk stjórnvöld sættu þó ekki aðeins ámæli fyrir að bregðast of seint við og óskipulega, heldur komu upp ítrekuð hneykslismál þar í landi, þar sem ráðamenn sjálfir, til dæmis Boris Johnson, reyndust ekki hafa fylgt þeim tilmælum sem stjórnvöld gáfu út.

Vefsíða rannsóknarinnar.