Þórarinn Eyfjörð, formaður Sameykis, skrifar pistil á vef Vísi undir heitinu Katrín og kvennabaráttan. Forsætisráðherra sagði í viðtali í þættinum Segðu mér við útvarpssjóra að hún eigi sér draum að fullu jafnrétti verði náð árið 2030 í samræmi við heimsmarkmið Sameinuðu þjóðanna.
Þórarinn Eyfjörð spyr í pistli sínum hvað standi í veginum og það þurfi framkvæmd til að láta drauma sína rætast. Hann segir, að á meðan hana dreymir um jafnrétti sé ríkissjórn hennar að skera niður í fjárveitingum til heilbrigðiskerfisins og standi fyrir niðurskurði til velferðarmála.
„Katrín veit hver staðan í efnahagsmálum þjóðarinnar er,“ skrifar Þórarinn. „Verðbólgan er mikil og kaupmáttarrýrnun launafólks staðreynd en hagnaður banka og fyrirtækja ævintýralega mikill. Þrátt fyrir orð Katrínar um að jafnrétti, efnahagslegt réttlæti og velferð á Íslandi skipti þjóðina öllu máli, stendur ríkisstjórnin fyrir niðurskurði til velferðarmála. Skorin er niður fjárveiting milli ára til heilbrigðiskerfisins og stefnan er sú að einkavæða opinberar stofnanir og skera niður í styrkjakerfum sem ungt fjölskyldufólk, einstæðir foreldrar og kvennastéttir á lágum launum þurfa að reiða sig á. Það er ekki einungis aðför að velferð þjóðarinnar heldur líka lýðræðinu því sameiginlegur opinber rekstur kerfanna skiptir máli fyrir velsæld í samfélaginu. Einkavæðing í þessum kerfum hefur kennt okkur að þjónustan verður dýrari og lakari. Samkvæmt niðurstöðum Hagstofu Íslands sem komu fram í skýrslu Vörðu – rannsóknarstofnunar vinnumarkaðarins í maí á þessu ári áttu um 24% landsmanna erfitt með að ná endum saman og 51,5% meðal einstæðra foreldra. Hlutfall þeirra sem ekki gátu mætt 180.000 kr. óvæntum útgjöldum var 22,5% árið 2021, en var einnig mun hærra meðal einstæðra foreldra, eða 41,1%.“
Þá segir hann í pistlinum að niðurskurður og uppsagnir opinberra starfsmanna sem ríkisstjórn Katrínar Jakobsdóttur standi fyrir bitni aðallega á störfum kvenna sem starfa í grunnþjónustunni og í framlínunni. Það sé varla neitt jafnrétti né réttlæti til í því.
„Þá stendur ríkisstjórn Katrínar fyrir því að kvennastéttir í framlínustörfum í grunnþjónustunni missi vinnuna vegna niðurskurðar og uppsagna. Í umsögn BSRB segir um niðurskurð ríkisstjórnarinnar í frumvarpi til fjárlaga 2024: „Alls nemur niðurskurðurinn um 8 milljörðum króna í frestun framkvæmda og um 9,6 milljörðum króna í rekstrarútgjöldum sem á fyrst og fremst á að nást með uppsögnum og starfsmannaveltu. […] Í jafnréttismati frumvarpsins kemur fram að lækkun launakostnaðar ríkisins mun bitna á konum fremur en körlum enda eru þær um tveir þriðju hlutar starfsfólks ríkisins. Konur eru einnig í meiri hluta þeirra starfa sem mun fækka vegna stafvæðingar.““